The Definitive Guide to Living in the Capital , Cairo , Egypt

في ظل الأزمات دايمًا بنشوف حاجات مبهجة مش بنشوفها ومش بتحصل غير في مصر.. والنهارده فيه خبر مبهج في وسط التوتر والقق اللي مسبباه أخبار انتشار فيروس كورونا المستجد، وفي الحقيقة الخبر يهم كل طلاب الجامعات المقيمين في المدن الجامعية التابعة لجامعة القاهرة.

الدكتور “محمد عثمان الخشت” رئيس جامعة القاهرة قال فى تصريح خاص لـ ” اليوم السابع ” إن المدن الجامعية هتبقى فاضية خلال فترة تعليق الدراسة، المستمرة أسبوعين تاليين هيبدأوا من 29 مارس، وبناءً عليه أصدر قرار بإعفاء الطلاب من سكان المدن الجامعية (حوالي 14 ألف طالب مغترب ووافد من مختلف المحافظات والدول) من أى رسوم  تتعلق بالمدينة الجامعية طول فترة تعليق الدراسة، ومش هيدفعوا غير تكلفة المدة الفعلية اللي قضوها في المدينة كنوع من التخفيف عنهم وعن أسرهم.

الخشت قال كمان إن دي هتبقى فرصة كويسة لتعقيم وتطهير المدن الجامعية فى إطار خطة الجامعة لمواجهة فيروس كورونا المستجد ومنع انتشاره.

القرار هيشمل الطلاب الساكنين في 5 مدن جامعية من المدن الجامعية في جامعة القاهرة وهي مدينة الطالبات بميدان الجيزة، ومدينة الطلاب بمنطقة بين السرايات، ومدينة الرعاية للطالبات ببولاق، ومدينة سكن كلية التمريض، ومدينة الشيخ زايد للطلاب.

خبر تاني مهم ومبهج، وليه علاقة مباشرة بطلاب جامعة القاهرة برده، وهو قرار علاج الحالات المرضية من الطلاب في أي مستشفى أو وحدة علاجية تابعة لجامعة القاهرة بدون تكلفة من وتحمل الجامعة لكل تكاليف العلاج.

القرار وافق عليه يوم الأربعاء  مجلس جامعة القاهرة، بعد ما كان العلاج للحالات المرضية للطلبة بتم في مستشفى الطلبة، واللي تعتبر المستشفى الوحيدة اللي بتستقبل الحالات المرضية للطلاب وتقدم لهم العلاج.

هيشمل القرار مستشفيات الجامعة المختلفة واللي منها مستشفى قصر العيني التعليمي الجديد (الفرنساوى)  ومستشفى المنيل الجامعي، ومستشفى أمراض النساء والتوليد، ومستشفى الأمراض الباطنة، ومستشفى الأطفال الجامعى الجديد، والعيادات الخارجية، وغيرها من المستشفايات التابعة للجامعة، وهيبقى العلاج والكشف بدون خطاب تحمل تكاليف أو دفع مقدم.