The Definitive Guide to Living in the Capital , Cairo , Egypt

كل سنة مع ذكرى حرب أكتوبر، بترجع الأغاني والصور والمشاهد اللي اتحفرت في ذاكرة أجيال كاملة من المصريين، لكن السينما كان ليها دور مختلف شوية. لأنها ما اكتفتش بتسجيل لحظة العبور والانتصار، لكنها حاولت تحكي عن الإنسان اللي عاش السنين اللي سبقتها: الجندي اللي خرج من هزيمة 67، والأسرة اللي استنت ابنها، وأهالي مدن القناة اللي عاشوا الحرب يوم بيوم، ومجتمع كامل كان محتاج يستعيد ثقته في نفسه.

والغريب إن عدد الأفلام المصرية الكبيرة اللي تناولت حرب أكتوبر بشكل مباشر مش ضخم زي ما ممكن نتخيل، لكن وسط الأعمال اللي اتعملت فيه أفلام لسه قادرة تعيش وتتفرج عليها النهارده، وبعضها بيقدم الحرب من زوايا أبعد بكتير من المعارك والدبابات.

بمناسبة ذكرى نصر أكتوبر، اخترنا لكم 5 أفلام مصرية ممكن تعملوا بيهم رحلة سينمائية تبدأ من آثار هزيمة 67، وتعدي على حرب الاستنزاف، وتنتهي عند اللحظة اللي كان الكل مستنيها: العبور.

الرصاصة لا تزال في جيبي

لو فيه فيلم ارتبط بحرب أكتوبر في الذاكرة الشعبية المصرية، فصعب تبدأ القائمة بحاجة غير الرصاصة لا تزال في جيبي.

الفيلم اتعرض لأول مرة يوم 6 أكتوبر 1974، بالظبط في الذكرى الأولى للحرب، وأخرجه حسام الدين مصطفى عن قصة وسيناريو وحوار إحسان عبد القدوس، مع كتابة رمسيس نجيب لمشاهد حرب 73. البطولة كانت لمحمود ياسين ونجوى إبراهيم وحسين فهمي ويوسف شعبان وسعيد صالح وصلاح السعدني.

لكن أهمية الفيلم مش في مشاهد الحرب بس، لأن الحكاية أساسًا بتبدأ من النكسة.

محمد المغاوري، اللي بيلعب دوره محمود ياسين، بيرجع من حرب 67 شايل جواه إحساس الهزيمة بكل ثقله. والرصاصة اللي لسه في جيبه هنا مش مجرد رصاصة بالمعنى الحرفي، لكنها وعد مؤجل، وحساب لسه ما اتقفلش.

الفيلم بياخد وقته في الرحلة بين 67 و73، وبيحط قدامنا مجتمع هو كمان محتاج يتغير. القرية فيها فساد واستغلال، ومحمد نفسه راجع مكسور نفسيًا من الحرب، وبعدها يبدأ بالتدريج يستعيد ثقته في نفسه وفي الجيش وفي إمكانية تغيير النتيجة.

ولما توصل حرب أكتوبر أخيرًا، مشاهد عبور قناة السويس وعبور الساتر الترابي واقتحام التحصينات بتبقى نهاية رحلة بدأت قبلها بست سنين.

ممكن بعض تفاصيل الفيلم النهارده تبان ميلودرامية جدًا، وممكن بعض الخطوط الجانبية تحس إنها أخدت مساحة أكبر من اللازم، لكن صعب تنكر قوة محمود ياسين، اللي كان واحد من أهم الوجوه السينمائية المرتبطة بأفلام الحرب في الفترة دي.

أبناء الصمت

في نفس السنة ظهر فيلم تاني عن الحرب، لكنه كان مختلف بشكل واضح.

أبناء الصمت للمخرج محمد راضي، عن قصة وسيناريو وحوار مجيد طوبيا، ومعاه مجموعة ضخمة من النجوم منهم نور الشريف وميرفت أمين ومحمود مرسي ومديحة كامل، بجانب أحمد زكي ومحمد صبحي وحمدي أحمد وسيد زيان.

الفيلم مش مستعجل يوصل لأكتوبر.. بالعكس، الجزء الأهم فيه هو الانتظار.

إحنا مع مجموعة جنود مرابطين على خط القناة خلال حرب الاستنزاف، وكل واحد منهم سايب حياة كاملة وراه. واحد عنده زوجة، والتاني عنده أم وأرض، والتالت مستني يتجوز، وكلهم عارفين إن المواجهة جاية لكن محدش عارف إمتى.

وفي الناحية التانية عندنا نبيلة، الصحفية اللي بتلعب دورها ميرفت أمين، وخطيبها مجدي اللي بيلعب دوره نور الشريف، ومعاهم رئيس التحرير رجائي اللي لعب دوره محمود مرسي. ومن خلال الخط ده، الفيلم بيبص كمان على القاهرة وعلى ناس عايشة حياتها بعيد عن الجبهة، ويسأل بشكل غير مباشر: هل المجتمع كله كان عايش نفس الحرب؟

الحكاية بتتحرك من أعقاب هزيمة 67 وحرب الاستنزاف لحد يوم 6 أكتوبر 1973، وبالتالي لما لحظة العبور تيجي، إحنا عارفين الثمن اللي اتدفع قبلها.

وده تحديدًا سر قوة أبناء الصمت.

هو مش فيلم عن بطل واحد خارق، لكنه فيلم عن مجموعة شباب عاديين جدًا، لكل واحد فيهم أحلام صغيرة وحياة مستنياه، وفجأة التاريخ حطهم في مكان أكبر بكتير من أحلامهم الشخصية.

العمر لحظة

محمد راضي رجع لأجواء الحرب مرة تانية سنة 1978، لكن المرة دي من خلال فيلم العمر لحظة، المأخوذ عن رواية ليوسف السباعي، وبطولة ماجدة وأحمد مظهر وناهد شريف ونبيلة عبيد ومحمد خيري، ومعاهم أحمد زكي في مرحلة مبكرة من مشواره.

والزاوية هنا مختلفة.

بطلة الفيلم نعمت (ماجدة) اللي بتشتغل صحفية، لكن بدل ما تفضل متابعة الحرب من مكتبها، بتبدأ تتطوع في المستشفيات وتقترب من الجنود والمصابين، وبعدها تروح للجبهة نفسها.

ومن هنا الفيلم بيعمل حاجة مهمة: الحرب مش بس اللي بيحصل للجنود وقت إطلاق النار، لكن كمان اللي بيحصل للناس اللي حواليهم.

فيه أم مستنية ابنها، وزوجة خايفة على زوجها، وصحفية بتشوف أسماء وأرقام الإصابات تتحول قدامها لبشر عندهم بيوت وأحلام وحكايات.

الأحداث بتتحرك من حالة الإحباط اللي أعقبت هزيمة 67، مرورًا بالفترة السابقة للحرب، لحد معارك أكتوبر والعبور.

الفيلم ابن زمنه جدًا، سواء في شكل العلاقات العاطفية أو الموسيقى أو الميلودراما، مع وجود ماجدة في قلب الأحداث بيدي الفيلم حس إنساني واضح، بعيد شوية عن فكرة إن فيلم الحرب لازم تكون كل مشاهده في الخنادق.

حكايات الغريب

ممكن نعتبر إن فيلم حكايات الغريب من أجمل المعالجات الدرامية للفترة كلها.

حكايات الغريب للمخرجة إنعام محمد علي، بطولة محمود الجندي وحسين الإمام وشريف منير ومحمد منير وهدى سلطان وصفاء الطوخي ومجموعة كبيرة من الفنانين.

هنا مفيش بطل عسكري تقليدي. البطل هو عبد الرحمن، مواطن مصري عادي جدًا دخلت هزيمة 67 جواه زي ما دخلت بيوت ملايين المصريين. إحساس بالإحباط واليأس وفقدان الثقة، قبل ما يتغير كل شيء مع الحرب والمقاومة.

والفيلم بياخدنا لمدينة السويس، المكان اللي ما كانش مجرد خلفية للحرب، لكنه كان واحد من أبطالها. وده اللي بيخلي حكايات الغريب مختلف. وبنشوف إزاي حدث بسيط زي اختفاء سيارة تابعة لجورنال ممكن يتحول لمدخل مثالي لأحداث أثرت على مصر كلها لحد النهارده.

الفيلم مهتم بالمواطن بقدر اهتمامه بالجندي، وبالمدينة بقدر اهتمامه بالمعركة. مهتم بالناس اللي قررت إن بيوتها وشوارعها مش مجرد مكان مستني الجيش يرجع يحرره، لكن مكان هما كمان مستعدين يدافعوا عنه.

عبد الرحمن نفسه بيتحول مع الأحداث من شخص غلب عليه اليأس بعد النكسة لشخص جزء من المقاومة، والفيلم بيستخدم حكايته علشان يحكي تحول أكبر حصل لجيل كامل بين 1967 و1973.

وأداء محمود الجندي هنا من أكتر الحاجات اللي بتدي الفيلم روحه. مفيش استعراض بطولة، لكن فيه إنسان عادي جدًا، ودي أصلًا الفكرة اللي الفيلم عايز يوصل لها: إن التاريخ مش بيصنعه دائمًا الأشخاص اللي أسماءهم مكتوبة في الكتب. أحيانًا بيصنعه شخص محدش يعرف اسمه.

الممر

ولو الأفلام الأربعة اللي فاتوا اتعمل معظمهم في وقت قريب نسبيًا من زمن الأحداث الفعلية، أو اعتمدوا على ذاكرة الجيل اللي عاشها، فـالممر جه بعد عقود طويلة علشان يقدم نفس المرحلة بإمكانيات السينما الحديثة.

الفيلم من تأليف وإخراج شريف عرفة، والحوار لأمير طعيمة، وبطولة أحمد عز وإياد نصار وأحمد رزق وأحمد فلوكس ومحمد فراج ومحمد الشرنوبي وأحمد صلاح حسني ومجموعة كبيرة من النجوم. واتعرض سنة 2019.

والأهم إن الممر مش عن حرب أكتوبر نفسها بشكل مباشر، لكنه عن الطريق اللي وصل لها. الفيلم يبدأ من آثار حرب 67، ويتابع مجموعة من قوات الصاعقة المصرية خلال حرب الاستنزاف، في الوقت اللي الجيش بيحاول فيه يعيد بناء نفسه، والمقاتل المصري بيحاول يستعيد ثقته في قدرته على المواجهة.

ودي يمكن أهم نقطة في الفيلم. لأن أكتوبر ماجاش فجأة صباح يوم 6 أكتوبر. كان قبله سنين من إعادة بناء الجيش والتدريب والعمليات وحرب الاستنزاف، والممر بيحاول يحول المرحلة دي لفيلم حرب حديث فيه عمليات عسكرية ومطاردات وانفجارات وتصوير واسع وإنتاج أكبر بكتير من اللي كان متاح للأفلام المصرية القديمة.

وطبعًا الفيلم مش خالي من المبالغة، وفيه لحظات واضحة جدًا معمولة علشان ترفع الحماس، لكن على مستوى الفرجة، هو غالبًا أسهل فيلم في القائمة بالنسبة لجمهور أصغر سنًا مش متعود على إيقاع سينما السبعينيات.
والأهم إن نهايته بتخليك فاهم إن اللي شوفته ماكانش النهاية. كان مجرد الممر للي جاي. وان الحرب كانت أكبر من مشهد العبور

ممكن نتفرج على حرب أكتوبر باعتبارها مجموعة مشاهد محفوظة: الجنود بيعبروا القناة، خراطيم المياه بتفتح الساتر الترابي، العلم المصري بيترفع، وخط بارليف بيتحول من حاجز اتقال إنه مستحيل اختراقه لشوية حطام…

لكن الأفلام الخمسة دي لما تتشاف جنب بعض بتحكي حكاية أوسع. حكاية عن إزاي شعب خرج من واحدة من أصعب لحظاته في يونيو 1967، وبعد 6 سنين بس، كان واقف على الضفة التانية من القناة في معجزة إنسانية وعسكرية هايفضل التاريخ يتوقف عندها ويسأل: يامصر بتعمليها إزاي؟!