Cairo 360
الويك إند وصل! ومن أيام قليلة، وبالتحديد يوم 31 أكتوبر اللي فات كنا بنحتفل بالهالوين. علشان كدة فكرنا نقدم لكم قائمة أفلام رعب من اللي على كيفك لكنها في نفس الوقت كوميدية ومناسبة للويك إند والتجمعات العائلية! تعالوا نشوف هنتفرج عليه إيه سوا… خاصةً إننا اخترنا لكم أفلام بعضها مرعب بجد وبعضها مرعب من النوع العائلي اللي يعمل إثارة لكن مش هيسبب كوابيس بالليل.
Totally Killer
لما القاتل المرعب الملقب بـ “Sweet Sixteen Killer” يرجع بعد 35 سنة من جريمته الأولى عشان يقتل ضحية تانية، بنشوف رحلة لبنت شابة عبر الزمن، بتحصل لها بالغلط، بترجع فيها لسنة 1987، علشان تحاول توقف القاتل قبل ما يبدأ جرائمه من الأساس.
Cobweb
ولد صغير، بيزعجه صوت طرقات مستمرة على جدار غرفة نومه. في البداية بيحسب الموضوع مجرد كوابيس متكررة بتزوره كل ليلة. لكن مع الوقت بيكتشف أن الموضوع له وضع أغرب من مجرد كوابيس. وإن فيه رسالة خفية فيه كيان ما محتاج يوصلها له. من هنا بتبدأ المغامرة المرعبة.
Haunted Mansion
بعد اكتشاف أن قصرها مسكون بالأشباح، بتحاول سيدة أنها تستعين بمجموعة أشخاص من خلفيات مختلفة علشان يطهروا قصرها من الأرواح الشريرة اللي فيه. فيلم كوميدي إلى حد ما مع حس من المغامرة ومناسب لكل أفراد الأسرة اللي عاوزين يتفرجوا على فيلم مرعب بس مش مرعب قوي.
The Curse of Bridge Hollow
بنت مراهقة عندها مشاكل في علاقتها مع والدها، لكنها بتتسبب عن طريق الخطأ في تشغيل لعنة قديمة، بتخليهم يقضوا ليلة هالوين صعبة جدًا وحقيقية جدًا بعد ما كانت مجرد خرافات واحتفالات بدون رعب حقيقي. لكن اللي هتتعلمه من خلال الليلة دي هي ضرورة توحيد جهودها مع أبوها علشان ينجوا من ليلة الرعب.
Hocus Pocus 2
فيلم عائلي كوميدي عن عودة الساحرات تاني لعالمنا الحديث، ومحاولتهم خطف الأطفال، وإزاي هيقدر أبطال الفيلم يمنعوهم من تنفيذ مخططهم الشرير.
الفيلم ده مثالي لأفراد الأسرة اللي بيحبوا الأفلام التقليدية عن الساحرات اللي بيستعملوا المقشة اللي بتطير. ومافيهوش رعب بنسبة كبيرة بالتالي هيكون اختيار مثالي للناس اللي قلوبهم ضعيفة شوية أو للأطفال.
