The Definitive Guide to Living in the Capital , Cairo , Egypt

الأسطورة بتقول إن كل واحد فينا بداخله موهبة مدفونة، محتاجة شوية تركيز واهتمام، وتدريب مستمر، علشان صاحبها يكون الأفضل في مجاله ويقدر يبهر العالم بنجاحه وتفوقه. من حقكم تشوفوا الكلام ده على أنه كلام من اللي بيتكتب في الكتب ويتقال في محاضرات التنمية البشرية. لكن فيلم The Swimmers بيقول لكم إن موهبتكم ممكن تكون السبب في بقائكم على قيد الحياة بالأساس!

فيلم The Swimmers مأخوذ عن قصة حقيقية. بيتعرض على منصة نتفليكس، وبيحكي عن الأختين يسرا وسارة مارديني، اللي بيتدربوا على السباحة في سوريا، على يد والدهم السباح. اللي بيحلم أن بناته تشارك في الألومبياد. لكن أحلام الأسرة بتتبخر مع اندلاع الحرب الأهلية السورية. وبعدها بتقرر الأختين دخول ألمانيا بطريقة غير مباشرة عن طريق البحر، والانضمام لعدد ضخم من اللاجئين اللي هربوا من جحيم الحرب.

أهم ما في فيلم The Swimmers هي اللحظات الصعبة اللي بيعيشها الأختين في قارب الهجرة غير الشرعية، لما بتيجي لحظة بيغرق فيها القارب ويضطر البنتين أنهم يستغلوا موهبتهم في السباحة علشان ينقذوا المهاجرين، وينقذوا نفسهم من المصير المحتوم. ده كان مشهد (ماستر سين) نجحت المخرجة سالي الحسيني أنها تظهره للمشاهدين بشكل أكتر من رائع.

والحقيقة أن سالي – وهي بريطانية من أصول مصرية- مش من المخرجين اللي عندهم أعمال كتيرة. لكن من الواضح أنها بتركز وبتخلص في الأعمال اللي بتشتغل عليها وبتعطيها من وقتها وروحها الكثير. والدليل هو خروج The Swimmers بالشكل اللي شوفناه بيه. خصوصًا لو عرفنا أن سالي شاركت في كتابة سيناريو الفيلم مع الكاتب جاك ثورن. وعجبنا أنها كانت مُصرة على أن السرد في الفيلم يكون بصري أكتر منه سمعي من خلال الحوار، أو مكتوب في الخلفية كعادة معظم أفلام السيرة الذاتية.

بعض جمهور أفلام السيرة الذاتية – خاصة في المنطقة العربية- مش متعودين على فكرة التعرض للشخصيات اللي بتتقدم في الفيلم كشخصيات حقيقية من لحم ودم لها أخطاء وسقطات. لكن صناع The Swimmers كانوا مصممين على أننا نشوف الاختلاف في الشخصية بين الأختين مارديني، واننا نفهم أن مش كل الناس تقدر تلتزم ببرامج التدريب الشاقة اللي بيخضع لها الأبطال الرياضيين علشان يحققوا أرقام قياسية أو يشاركوا في مسابقات عالمية. من هنا كان الاختلاف الأساسي في طريقة تقديم كل شخصية من شخصيات الفيلم على الرغم من أنهن شقيقات. وهو ده مستوى الواقعية اللي كنا متوقعينه من الفيلم. واللي قدر يقدم لنا تجسيد ممتاز من خلال أداء تمثيلي عظيم من بطلات الفيلم منال وناتالي عيسى. وهنا بيظهر ذكاء المخرجة سالي الحسيني في استغلال الكيمياء بين الأختين عيسى علشان يقدموا دور الأختين مارديني.

طبعًا مانقدرش ننسى دور أحمد مالك اللي أثبت لنا أنه ممثل قوي قادر يتقن اللهجة السورية بإجادة تُحسب له. ونتوقع أنها هتفتح له الفترة القادمة باب أدوار مختلفة بلهجات متباينة.

مشكلتنا مع The Swimmers كانت طول زمن العرض. وحسينا إن بعض جوانب الأحداث كان ممكن يتم اختصارها بدون إخلال بالسياق العام للفيلم. لكن إجمالًا، يظل The Swimmers من الأفلام القوية اللي ننصح بمشاهدتها.

يقول الراوي إن داخل كل واحد فينا موهبة ممكن تكون السبب في نجاته من الموت. ودي مش أسطورة، دي حقيقة بتحصل حوالينا كل يوم، وفيلم The Swimmers هو مجرد إثبات عملي على صحة الكلام ده.