The Definitive Guide to Living in the Capital , Cairo , Egypt

من المشاهد الافتتاحية لفيلم Ambulance، بنحس أننا أمام فيلم تقليدي عن عملية سرقة بنك، وتداعياتها. لكن الحقيقة أن Ambulance هو فيلم عن مطاردة غير منطقية أو طبيعية. بين الشرطة الأمريكية.. وعربية إسعاف!

علشان نفهم إيه اللي خلى الأمور توصل لكده، لازم نشوف قصة (ويل شارب) – قام بالدور يحيي عبد المتين- اللي بيسعى أنه يعمل عملية خطيرة لزوجته المريضة بالسرطان، لكنه مش معاه فلوس العملية، فبيضطر يشترك في عملية سرقة بنك بمشاركة صديقه داني -قام بالدور جيك جيلنهال- وبتتطور عملية السرقة علشان تبقى مطارده بين سيارة إسعاف فيها المجرمين، وكل شرطة المدينة من ناحية تانية.

رغم أن القصة تبان نمطية، والنهاية نمطية، والشخصيات نمطية، لكن الفيلم نفسه مش نمطي إطلاقًا، والسر هنا في الإخراج العظيم من مايكل باي واللي تخصص في إخراج أفلام رعب وأكشن في معظم مسيرته الفنية.

على الرغم من أن فكرة المطاردة في حد ذاتها مش جديدة على هوليوود، وكانت جزء مهم من أعمال قوية زي كل الأعمال اللي تناولت قصة المجرم ولاعب البيسبول الشهير أو جي سيمبسون اللي هرب من الشرطة في مطاردة حقيقية استمرت لوقت طويل وصورتها وكالات الأنباء لكن Ambulance حول المطاردة من مجرد جزء من الأحداث، للحدث الرئيسي على مدار حوالي ساعتين كاملين.

ساعتين ما حسيناش فيهم أننا زهقانين ولو ثانية واحدة، والسبب هنا هو السيناريو المُحكم من كريس فيداك و لوريتس مونش بيترسن. واللي خلانا مقتنعين بكل مشهد، خصوصًا مع البناء الدرامي الممتاز لكل واحد من الأبطال، بحيث نبقى عارفين أسباب ودوافع كل شخصية، لدرجة أننا نكون متعاطفين أحيانًا مع المجرمين ضد الشرطة. لكن في رأينا أن شخصية داني، ما تمش التأسيس لها بالشكل الكافي في السيناريو، ويمكن ده مقصود علشان نشوف شخصية شريرة أشبه بشخصية الجوكر في أفلام باتمان. أو يمكن أن المؤلفين حسوا أن المشاهدين هايستنتجوا لوحدهم أن دوافع داني هي دوافع الشرير الطبيعية، وهي البحث عن الفلوس بطريقة غير مشروعة.

على الرغم من تركيز Ambulance الأساسي على الأكشن والمطاردات، لكن فيه خيط كوميدي أكتر من رائع، بين كل الشخصيات تقريبًا. كوميديا ذكية في ضفيرة واحدة مع الأحداث، وناتجة عن الأحداث نفسها مش مُقحمة عليها، ومش قاصرة على شخصية واحده، وكل إيفيه كوميدي بيتقال كان مرتبط بالشخصية اللي بتقوله وماينفعش يطلع غير منها. وده سبب أساسي في زيادة متعتنا أثناء المشاهدة.

Ambulance مثال حي، على فيلم بقصة عادية، وأبطال عاديين، لكن السيناريو السريع، مع الكتابة الذكية، والإخراج المُختلف، خلونا في الأخر نشوف فيلم جميل ومميز، ويصلح للمشاهدة لمحبي الأكشن والكوميديا والمطاردات وسرقات البنوك.