The Definitive Guide to Living in the Capital , Cairo , Egypt

من الواضح أن الأسلوب الإخراجي للمخرج بيتر ميمي بيتصاعد يوم بعد يوم، وبيكتسب أرض جديدة ومساحات أكبر من الإبداع، وبدل ما كنا زمان بنعتبر وجود اسم ميمي على فيلم علامة من علامات الأفلام التجارية غير المتعوب فيها، مع عرض مسلسل الأب الروحي وفيلم القرد بيتكلم… ممكن فكرتنا تختلف شوية.

القرد بيتكلم من بطولة أحمد الفيشاوي، عمرو واكد، وريهام حجاج، بالاشتراك مع بيومي فؤاد وسيد رجب وليلي عز العرب.

ريهام حجاج بتستمر في مسلسل السقوط الفني بالتصوير البطيء.. ومن الواضح أن اختياراتها في الأدوار اللي بتقوم بها غير موفقة بالمرة، والحقيقة مش عارفين ليه بتُصر موهبة حقيقية وقوية زيها على تقديم أدوار مساندة وضعيفة وهامشية، والأسوأ أنها بتقدم الأدوار دي بشكل ضعيف وبدون اقتناع.

الفيلم بيتميز بقوة فيما يتعلق بالحبكة والسيناريو، على الرغم من تأثره بفيلم أجنبي زي Now you see me لكن الفيلم قدر يطور حبكته الشخصية ومايتحولش لمجرد تمصير لفيلم أجنبي، وده كان المميز على صعيد القصة والحبكة.

مشاهد المطاردات في الفيلم كانت متميزة، لكن مشاهد السحر كانت محتاجة تكون أقوي من كده، كمان الموسيقى التصويرية كانت سيئة جدًا وكانت محتاجة يتم تغييرها بالكامل لموسيقى أكثر مناسبة للأحداث.

القرد بيتكلم فيلم خفيف وظريف، وبيقدم أكشن وحبكة وشغل سحر وخدع لا بأس بيهم، ونقدر نعتبره تسلية مناسبة على مدار ساعتين… استمتعوا بالفيلم في الويك إند.

علشان تبقي عارف: مخرج الفيلم بيتر ميمي هو مخرج فيلم الهرم الرابع ومسلسل الأب الروحي اللي بيعرض حاليًا على قنوات DMC.