The Definitive Guide to Living in the Capital , Cairo , Egypt

رنا شرف

عيد الأم، كل سنة وكل أم طيبة، والأم المصرية معروفة بطبيعتها المختلفة عن باقي الأمهات على الكوكب، والسينما نجحت بشكل كبير في توثيق طبيعة الأم المصرية حتى لو بشكل درامي فيه شوية خيال. تعالوا نتعرف على 5 أفلام سينمائية كلاسيكية عبرت عن الأم في مصر بطريقة صادقة جدًا.

أعز الحبايب

فيلم كلاسيكي جميل وبسيط، بيورينا مشاعر الأم لما تتعرض لظلم وعدم تقدير رغم تعبها في حياتها، والفنانة الكبيرة أمينة رزق كانت مدهشة في العمل ده.

لا تسألنى من أنا

للعظيمة شادية، واللي في الحقيقة ماكنتش أم، لكنها جسدت الدور بطريقة صادقة وحقيقية، ونجحت تورينا الأم الفقيرة المضحية اللي بتحاول تأمن حياة كريمة لأولادها.

أم العروسة

من ألافلام الكوميدية الاجتماعية اللي صورت الأم المصرية بشكل مبهر وواقعي، خصوصًا في الوفت اللي بتجهز فيه بنتها للزواج! والحقيقة أداء الفنانة الكبيرة تحية كاريوكا كان مدرسة.

امرأة علي الهامش

من الأفلام المظلومة للفنانة الكبيرة هند رستم، مابيتعرضش كتير لكنه فيلم مهم، بيجسد تضحية الأم بشكل إنساني رائع.

الحفيد

فيلم بسيط وخفيف وواقعي، ببساطة بيحكي عن بيوت المصريين في فترة زمنية مهمة من تاريخ مصر الحديث، وكلنا شوفنا في الفيلم ده بيوتنا وأهالينا. الجميلة كريمة مختار والقدير عبد المنعم مدبولي كانوا دويتو مدهش في الفيلم ده!

شوفوا الأفلام دي في أقرب فرصة لو ماكنتوش اتفرجتوا عليها! علشان تعرفوا يعني إيه أم! كل سنة وكل أم بخير وسعادة.