The Definitive Guide to Living in the Capital , Cairo , Egypt

تخيل إنك تصحى في يوم عادي، وتكتشف إن فيه رقم غريب ظهر على جسمك، ومحدش قادر يقولك معناه إيه. هتتصرف إزاي؟ وهتفضل الشخص نفسه لو الرقم ده بدأ يتغير؟ وكل يوم الرقم يبقى أقل من اليوم اللي قبله. طيب هيحصل إيه لما الرقم يوصل لصفر؟ من السؤال البسيط والمخيف ده بتبدأ رواية الرقيم، اللي بتعرف تخلط الغموض بالدراما الإنسانية، وتشد القارئ من غير ما تعتمد على الألغاز بس.

محمد كارم في رواية الرقيم بيحكي عن راجل اسمه برهان، في منتصف الأربعينيات، ساكن في المعادي، وحياته ماشية بنظام ثابت لدرجة الملل. زمان كان بيحلم يبقى كاتب مشهور، وزوجته يسار كانت بتحلم بالرسم، لكن الشغل والجواز ومسؤوليات البيت خلوا الأحلام دي تتراجع لآخر القائمة.

ظهور رقم غامض على ضهر برهان، وتغيره بطريقة غير مفهومة، وإن مع نهاية كل يوم الرقم ده بيقل، بيهز الاستقرار الظاهري ده، وبيخليه يواجه أسئلة أكبر بكتير من مجرد تفسير علامة على الجلد. الرقم اللي عامل زي العد التنازلي كان زي الطوبة اللي اترمت في بِركة حياة برهان الراكدة.

الجميل في الرواية إن الكاتب ما بيحبسناش جوه أزمة برهان وبس. بنتعرف مع الوقت واستمرار القصة على حياة، الست اللي بتشيل مسؤولية علاج أمها وسط ظروف قاسية بتدفعها هي نفسها لاختيارات قاسية، وعلى حسام، المحامي اللي متعود يحكم على كل حاجة بالعقل والأدلة، وعلى يسار اللي ليها مخاوفها وإحباطاتها الخاصة. اختلاف الشخصيات دي بيخلي نفس الظاهرة تظهر من أكتر من زاوية: خوف، وتعاطف، وشك، ومحاولة مستمرة للبحث عن إجابة. الجميل إنها مش إجابة على الأسئلة الظاهرة في الرواية بس، لكن أسئلتنا إحنا لنفسنا عن مدى تعاطفنا وحبنا أو كرهنا لكل شخصية.

كمان الرواية شاطرة في نقل الأحداث تدريجيا من مساحة البيت والعلاقات الشخصية إلى عيادات الأطباء، وبعدها إلى الإعلام والمؤسسات والصراع على تفسير اللي بيحصل. الفصول القصيرة والتنقل بين الشخصيات بيدوا الحكاية إيقاع سريع، خصوصا مع فكرة العد التنازلي اللي بتخليك حاسس إن الوقت نفسه بقى شخصية في الرواية.

ومن نقاط القوة كمان إن الرواية بتستغل المواجهة بين التفسير العلمي والديني والشعبي من غير ما تقدم إجابة سهلة من البداية. الطبيب بيحاول يفهم بالأجهزة والتحاليل، وحسام بيشكك في أي حاجة ما يقدرش يثبتها، وفي المقابل فيه شخصيات بتبحث عن الطمأنينة بطرق تانية. الصدام ده بيكشف طبيعة كل شخصية لما بتتحط قدام حاجة مش قادرة تتحكم فيها.

مع كل ده، عندنا تحفظ على المبالغة الشديدة في حجم الاهتمام العالمي بالظاهرة. انتقال الحكاية من حالة غامضة في القاهرة إلى اهتمام دولي كان مفاجأة لينا وتطور غير مسبوق في الأحداث، لكن في نفس الوقت، وزي ما قلنا، حسينا فيه بمبالغة كبيرة. مش هنقدر نتكلم كتير عن النقطة دي علشان ما نحرقش عليكم الأحداث، وبشكل عام المبالغة دي ما أثرتش على حلاوة القصة كلها.

رواية الرقيم رواية جذابة، فيها معالجة مشوقة لفكرة غامضة، وشخصيات مش شريرة تماما ولا طيبة تماما، وأسئلة بتفضل معاك بعد ما تقفل الكتاب. لو بتحب الغموض اللي يجبرك تسأل نفسك أسئلة ما سألتهاش قبل كده، فهي تستحق وقتك.