The Definitive Guide to Living in the Capital , Cairo , Egypt

الصورة الرئيسية: Rawan Yasser

الصورة الداخلية: Eugenia Pankiv

رمضان على الأبواب، ومعاه بتبدأ الفرحة الحقيقية بزينة الشوارع والفوانيس اللي بتنور البيوت والقلوب. كل سنة بنستناه بالشوق، وأول حاجة بتخطر في بالنا هي الفانوس، اللي بقى رمز أساسي لاستقبال الشهر الكريم. سواء كنت بتدور على فانوس لأولادك، لبيتك، أو حتى هدية لحد عزيز عليك، إحنا هنا عشان نقولك فين تلاقي أحلى وأجمل الفوانيس في القاهرة.

خلينا متفقين إن الفانوس مش مجرد ديكور رمضاني، ده رمز الفرحة والبهجة اللي بيعيش معانا من الطفولة لحد ما بنكبر. ومن سنة لسنة، الحرفيين في مصر بيتفننوا في أشكاله، من الخشب المزخرف، للنحاس المزود بالكريستال، للزجاج الملوّن اللي بيعكس روح الشهر الكريم.

إيه الجديد في فوانيس رمضان السنة دي؟

الفوانيس الخشب ظهرت بقوة السنة دي، تصميمات فنية متداخلة بتتجمع زي البازل بأشكال مميزة، منها اللي مرسوم عليه جامع، أو كلمة “رمضان كريم”، ومنها الصغير اللي ممكن يكون ميدالية مفاتيح.

أما الفوانيس الكلاسيكية المصنوعة من المعدن والنحاس، فظهرت منها تصاميم مبهجة، زي الفانوس اللي أبوابه طويلة بألوان زاهية، أو المتخرم بنجوم وبينزل منه كريستالات ملوّنة. شكلها لوحده بيخليك محتار تختار أي واحد!

وطبعًا، الفوانيس القماش مستمرة، بتصميمات مستوحاة من خيام رمضان، وبتضيف لمسة تراثية جميلة على الديكور.

أشهر أماكن بيع الفوانيس في القاهرة:

السيدة زينب: شارع كامل مليان أكشاك فوانيس وزينة رمضان، والأسعار هناك مناسبة جدًا.

الحسين وشارع المعز: مش بس فوانيس، ده كمان روح رمضان بتتجسد في المكان.

المعادي: شارع 9.

المنيل: شارع المنيل عند العمدة قبل ماكدونالدز.

الدقي: تحت كوبري شارع التحرير.

العجوزة: شارع الفلوجة عند مستشفى العجوزة خلف نعمة.

ما تنساش وأنت بتشتري فانوس لأولادك أو لبيتك، إن الأهم هو المعنى اللي وراه، الفرحة اللي في قلوبنا، والبهجة اللي بتعيش معانا طول الشهر الكريم. رمضان كريم، وافرحوا بالفوانيس!