The Definitive Guide to Living in the Capital , Cairo , Egypt

الصورة الرئيسية: Mayur Gala

القاهرة مليانة أماكن ينفع تبقى لوكيشن لصور رومانسية تحفة، تبقى ذكرى جميلة تفضل معاك. في كايرو 360 جمعنالك 5 أماكن هتكون خلفية وهمية لصورك في الفلانتين، وفي نفس الوقت هتقضي خروجة لطيفة ومش مكلفة.

1 – كوبري المانسترلي
لو بتحب الأماكن الكلاسيكية اللي بتحكي جزء من تاريخ القاهرة، يبقى لازم تروح كوبري المانسترلي في المنيل. بعد التطوير، المكان بقى تحفة فنية حقيقية! الخشب العتيق، منظر النيل، وزوايا التصوير المختلفة هتخلي كل صورة حكاية. ولو عايز صورة بكاميرا محترفة، هتلاقي هناك شباب مصورين بيطلعوا لقطات خرافية بسعر معقول، وهيوصلوهالك على موبايلك عشان تطبعها براحتك.

2 – شجرة الزمالك
أو زي ما بيقولوا عليها “شجرة برج القاهرة”، اللي عمرها أكتر من 150 سنة! شكلها بجد خرافي وكأنها مشهد من فيلم فانتازي. النهار هو أنسب وقت للتصوير هناك، والإضاءة الطبيعية هتخلي صورك حاجة من عالم تاني.

3 – دجلة المعادي
لو عايز مكان هادي وبعيد عن الدوشة، دجلة المعادي هو الاختيار المثالي. الأشجار في كل مكان، وزوايا التصوير هناك مختلفة تمامًا عن أي مكان تاني. عند شارع 250، عند طريق القطر، أو حتى جنب محطة مترو ثكنات المعادي، هتلاقي أماكن شبه الغابات، هتخلي صورك أحلى حاجة في عيد الحب.

4 – شارع المعز
كل مبنى في شارع المعز عبارة عن خلفية فنية للتصوير، المساجد والبيوت التاريخية هتنقلك لعصر مختلف تمامًا. نصيحة: روح الصبح عشان تهرب من الزحمة، وكمان الشمس هتساعد في إضاءة صورك بشكل طبيعي.

5 – حديقة أم كلثوم
حديقة مميزة جدًا على ضفاف نيل القاهرة، موجودة في المنيل، شارع عبد العزيز آل سعود، بعد المسرح العائم. المساحات الخضراء، وموقعها على النيل، وكذا لوكيشن جوه الحديقة هيخلوك تخرج منها بألبوم صور مالوش حل!

وأخيرًا..

أيه من الأماكن دي جربته قبل كده؟ أو عندك ترشيح تاني لمكان تصوير رومانسي في القاهرة؟ شاركنا في التعليقات!