هل الموسم التاني من Squid Game قد التحدي؟
Squid Game ألعاب الموت ألعاب مكررة الكوميديا في Squid Game الموسم الثاني جي هون دراما كورية شخصيات جديدة نتفليكس نجاح عالمي
Cairo 360
محمد البدري
بعد النجاح العالمي المدوي للجزء الأول، رجعت لعبة Squid Game بموسم جديد مليان بالإثارة والتحديات القاتلة، لكن المرة دي القصة واخدة اتجاه مختلف تمامًا! هتكتشف أبعاد جديدة للشخصيات، صراعات نفسية غير مسبوقة، وحكايات تخليك مشدود للشاشة. بس يا ترى، هل الجزء التاني قدر يحافظ على قوة الأول؟ خلينا نشوف!
على الرغم من أن الأعمال الدرامية المعتمدة على فكرة أن مجموعة من الأشخاص بيتنافسوا تنافسًا شرسًا في مجموعة ألعاب، الخسارة فيها تعني الموت، مش فكرة جديدة، وسبق وشوفناها في سلسلة أفلام مهمة زي The Hunger Games إنتاج سنة 2012 من بطولة جينيفر لورانس، وأعمال تانية كتير تناولت نفس التيمة، إلا أن مسلسل Squid Game الكوري، اللي أنتجته نتفليكس وعُرض الموسم الأول منه سنة 2021 وبيتعرض حاليًا الموسم الثاني منه، حقق نجاحًا عالميًا ساحقًا، لا يمكن تجاهله، واحتل صدارة المشاهدات بعدد لا يمكن التغلب عليه حتى الآن، مش بس على منصة نتفليكس، لكن كمان على المنصات والمواقع اللي بتعرض الأعمال بشكل غير رسمي ومقرصن.
الجزء الأول انتهى عند نجاح البطل جي هون (لي جونج جاي) في الفوز بالدورة الأولى من الألعاب، وشاف بنفسه عشرات المتنافسين وهما بيتقتلوا في سبيل التنافس على كمية ضخمة من الفلوس، لكن فوزه بالمسابقة وخروجه على قيد الحياة مش معناه أن معاناته انتهت. لأن الفوز الدموي تركه مع عقدة نفسية غيرت حياته، وجعلته عايز يستثمر الفلوس اللي كسبها علشان يتغلب على اللعبة ويجبر القائمين عليها إنهم يوقفوها للأبد.
علشان يحقق هدفه، جي هون بيأجر مجموعة أشخاص تحاول تتبع خط سير اللعبة من البداية، من مرحلة التجنيد اللي بيقوم فيها شخص غامض بعرض لعبة على الأشخاص الفقراء والمطحونين بالديون، في سبيل إقناعهم بالدخول في المنافسة القاتلة، زي ما تم مع جي هون في الجزء الأول بالظبط. وبنشوف في الحلقات الأولى سعي مستمر منه علشان يوصل لطرف خيط يخليه يقتحم عالم اللعبة تاني.
مع استمرار الأحداث، بيقرر جي هون أنه يلتحق باللعبة تاني علشان يعطلها ويوقفها من الداخل، لأنه اكتشف إن تعطيلها من الخارج أمر شبه مستحيل. ومن هنا بتبدأ سلسلة جديدة من الألعاب، لكن المرة دي مع لاعب أساسي عنده دافع أكبر من مجرد الفوز بالمال. ومن هنا بييجي الاختلاف في الجزء الثاني عن الأول.
مع بداية الألعاب بنبدأ نشوف الشخصيات الجديدة اللي بتتنافس المرة دي. صناع Squid Game عملوا تنوع غريب بين شخصيات اللعبة، مثلًا بنشوف شخصية أم وابنها، اللي مش بس بيتنافسوا في الألعاب، لكن بيحاولوا يحافظوا على الرابطة الأسرية بينهم، واللي طبعًا هايتعرض لاختبار قاسي مش عاوزين نحرقه عليكم من خلال الأحداث.
كمان بنشوف شخصية يوتيوبر مشهور بيتورط في اللعبة بعد ما بيقنع ملايين الأشخاص حول العالم إنهم يستثمروا فلوسهم في عملة مشفرة بتثبت فشلها، ومن ثم بيصبح مديون بمبلغ ضخم بالإضافة للعبء النفسي الهائل اللي بيقع عليه لما بيقابل ضحاياه اللي وثقوا فيه من خلال أحداث اللعبة.
من الشخصيات اللي حازت على إعجاب واهتمام مشاهدين كتير، شخصية مغني راب مغرور ومختل، بيحاول ينجح في الألعاب ويستمر فيها للنهاية، رغم إنه بيشوف بعينه أن مجرد خطأ واحد كفيل بإنهاء حياة اللاعب، لكن واضح أن سطوة الفلوس بتدفع النفس البشرية لاختيارات مؤذية، لمجرد وجود احتمال ولو ضئيل في النجاح.
الجزء الجديد كمان بياخدنا في عوالم الحراس القائمين على اللعبة، وبنشوف أنهم كمان أشخاص لهم أحلام وطموحات، مش مجرد ناس بتنفذ المطلوب منها بشكل آلي زي ما شوفنا في الموسم الأول. لكن مش معنى أن الموسم الثاني من Squid Game نجح في كل ده، إنه مكانش موسم بدون مشاكل.
أولًا، بنلاحظ بطء شديد في تطور الأحداث، بمعنى إننا بنشوف أكتر من حلقة في حكي محاولة البطل الالتحاق باللعبة، مع إننا كلنا واثقين إنه هاينجح في الدخول لها في النهاية، يبقى إيه لازمة المط والتطويل في المرحلة دي من السيناريو؟! كمان محاولة إقحام خطوط كوميدية في الأحداث كانت فاشلة مقارنة بالموسم الأول اللي كان فيه بجد لقطات كوميدية تفجرت من خلال الأحداث المأساوية وبشكل مكتوب ومنفذ بشكل أفضل بكتير من الموسم التاني.
ثانيًا، حسينا بكتير من الاقتباسات الزايدة عن اللزوم من الموسم الأول، يكفي أننا نقول إن اللعبة الأولى في الموسم الجديد، واللي المفترض المشاهد يكون متحمس لها جدًا، كانت هي نفسها اللعبة الأولى في الموسم الأول، وده محبط ويدينا إحساس إن فيه إفلاس في اكتشاف أفكار ألعاب جديدة.
وعلى الرغم من إننا خرجنا من الموسم الأول بمشاعر قوية – سواء بالحب أو الكراهية – ناحية الأبطال كلهم، إلا أنه صعب تحتفظ بمشاعر حقيقية وطويلة المدى مع شخصيات الموسم التاني، لأن ما تمش تقديمهم بشكل عميق يخلق حالة من التعاطف من المشاهد تجاههم.
هل معنى كده إن الموسم التاني من Squid Game ما يستحقش المشاهدة؟ بالعكس، يستحق إنكم تشوفوه، لكن في اعتقادنا إنه مش هيحقق نفس حالة الضجة اللي خلقها الموسم الأول. ومع ذلك، العمل كله بأجزاؤه يعتبر من الأعمال الناجحة اللي تستحق تضيع وقتك – وباقة النت – عليها.
