The Definitive Guide to Living in the Capital , Cairo , Egypt

الصورة الرئيسية: Ahmed Adly

بما أن الأجواء الصيفية مرهقة والحرارة متقلبة والجو بيخلينا نكسل إحنا جايين نشجعكم ونقولكم أخرجوا وأنبسطوا لمدة يوم واحد علشان الرحلة دي ممكن متتكرش تاني بسبب الكسل اللي بتسببه حرارة الصيف، ولكن كانبساط هتكون فسحة العمر، لأنكم هتمارسوا كل حاجة ترفع الأدرينالين وتخليكم مبسوطين في قلب العاصمة باقتراحات مميزة بيقدمها محررين كايرو 360، وتعالوا نتعرف على المتعة بجد في السطور اللي جاية.

البداية مع نسيم الصباح أنكم تصحوا بدري وتبدأوا يومكم بفطار مصري مميز سواء كان على عربية فول في أي منطقة أو كان عند سعد الحرامي في وسط البلد، زوبا الزمالك، أربياتا مصر الجديدة، العمدة في الدقي، وغيرهم من الأماكن الشهيرة في مناطق القاهرة الكبرى، أو تقدروا تفطروا فطار مختلف كرواسون وكابتشينو وغيرهم من المخبوزات من مختلف المطابخ الفرنسية والإيطالية من عند Tbs أو poul وفروعهم منتشرة في كل مكان، وكمان ممكن تزوروا ريشيوز المعادي أو Bouchée مصر الجديدة، وفيه كمان فورناليا الزمالك و palmé bakery بالتجمع الاول.

خلصنا فطارنا فندخل بقى على تشجيع السياحة الداخلية، وتقدروا تزوروا المتحف المصري بالتحرير أو المتحف المصري الكبير وده لازم حجز مسبق له، وممكن تروحوا الأهرامات، أو متحف الحضارات وكمان تقدروا تزوروا مسجد عمرو بن العاص والمعبد اليهودي والمتحف القبطي في مجمع الأديان مصر القديمة، أو المتحف الإسلامي بباب الخلق، وممكن تروحوا تتمشوا في شارع المعز علشان تتفرجوا على القاهرة الفاطمية بكل إبداعتها في التصميم والبناء.

أما لو وصلتوا لميعاد الغداء فإحنا بنرشح لكم أماكن مختلفة بعيدًا عن الأماكن التريند زي فيش آند شيبس وسط البلد، مطعم الإخلاص فتحي روض الفرج، كبدة القاضي في المعز، النجاحي في الغورية، طشة في وسط البلد، أبو حيدر مصر الجديدة، الصباحي وسمسمة ونعمة في الدقي، مطعم كفتة وكايزو في التجمع، ستديو مصر وتوماس الزمالك.

بعد الغداء لازم تحبسوا بكوباية قهوة أو شاي، ويفضل طبعًا عصير، ومتنسوش لازم يكون معاكم مياه كتير طول اليوم ودي أهم حاجة تعملوها، ويفضل تاخدوا مشروبكم في أقرب قهوة بلدي في المنطقة اللي أنتوا فيها واستمتعوا بكل تفصيلة مش هتشوفوها غير من القهوة البلدي، وبعدها تقدروا تختاروا خروجة لحديقة عامة أو مكان بيقدم ألعاب وأنشطة مختلفة، زي حديقة الأزهر والحرية والأسماك والمعادي وغيرهم، والألعاب ممكن تكون في دريم بارك أو الملاهي وغيرهم وكمان تقدروا تتمشوا في مولات مميزة وتلعبوا فيها كمان زي مول العرب ومول مصر وسيتي ستارز وكايرو فيستيفال والحرية وسيتي ووك وغيرهم من المولات الكتير جدًا موجودة في القاهرة.

وبعد اللفة الجامدة دي ممكن تريحوا بقى وتروحوا سينما حسب العروض المتاحة وحبكم للأفلام والنجوم سواء عربي أو إنجليزي، ومتنسوش تشتروا فشار وتعيشوا حياتكم وتستمتعوا باليوم، ودي هتكون ختام اليوم اللي ممكن تقضوه مع الأسرة أو الأصدقاء وحتى لو وحدكم، المهم أنكم تستمتعوا بكل تفصيلة فيه، ومتنسوش أنتوا مش مرتبطين بترشيحاتنا لأن أكيد عندكم ترشيحات أكتر وأفضل بالنسبة للمود بتاعكم ودماغكم، المهم انكم تخرجوا وتنبسطوا ومتخلوش الصيف ودرجة الحرارة العالية تنكد عليكم.