The Definitive Guide to Living in the Capital , Cairo , Egypt

بما أن عيد الأضحى 2024 وصل مع إجازة الصيف، وبما أن إجازة العيد السنة دي طويلة وهتوصل لأكثر من أسبوع، يبقى أكيد كتير مننا هيضربوا  عصفورين بحجر وهينسافروا للمصيف! سواء على شواطئ البحر الأحمر أو الأبيض في مختلف أنحاء مصر، لكن ساعات ببنسى حاجات مهمة خاصة بالمصيف وإحنا مسافرين. علشان كده قررنا نقول لكم على الأساسيات اللي ماينفعش تنسوها وأنتم مسافرين في إجازة العيد والصيف، واللي أكيد هتحتاجوها سواء في الشاليه أو الشاطئ.

البداية لازم يكون معاكم شنطة إسعافات أولية، ودي مهمة جدًا في أي رحلة ونتمنى ماحدش يحتاج يستخدمها ولكن وجودها مهم، وكمان من الأساسيات لو أنتم أسرة أو شلة أصدقاء يكون كل شخص معاه كل مستلزماته الشخصية وممنوع استخدام أي شخص لمستلزمات الآخر حتى لو صغيرة، وماتنسوش الصن سكرين والصن بلوك وأسعارهم بتبدأ من 100 جنيه حسب النوع ودرجة الحماية، لأن وجودهم قادر يخليكم تستمتعوا بالمصيف ولو مش معاكم هتزعلوا وهتقضوها في الشاليه أو الغرفة طوال النهار.

خليكم فاكرين أننا بنحب في المصيف نعمل حفلات باربيكيو وسمر وسهر وحكايات، وعلشان كده إحنا بنفضل دايمًا يكون فيه شواية لحوم معانا لو الشاليه مافيهوش، وأسعارها تبدأ من 1200 جنيه تقريبًا، وتقدروا تشتروها أونلاين أو من أي محل متخصص بالشوايات ودول موجودين كتير في السيدة زينب ووسط البلد وغمرة، أو من محلات زي آي كيا ورنين وغيرهم.

ولو أنتم في فيلا أو شاليه له مساحة خضراء قدامه فجربوا يكون معاكم حمام سباحة محمول علشان الأطفال اللي معاكم يستمتعوا بحفلات المشروبات الفريش وهم في المياه، ودي أسعارها بتختلف حسب الحجم والجودة والمادة المصنعة وتبدأ من 130 جنيه للأطفال وتوصل لحد 60 ألف جنيه، وبيتباع أونلاين أكتر في مواقع زي نون وأمازون، وكمان موجودة عند محلات الأدوات الرياضية وبعض محلات ملابس البحر ومحلات الهدايا، وماتنسوش كمان تشتروا آيس بوكس علشان كل تحركاتكم يكون فيها مياه وعصير ساقع في ظل ارتفاع درجات الحرارة، وأشهر ماركة موجودة في مصر هي “تانك” وبتتباع في السوبر ماركت ومحلات الأدوات المنزلية وكبرى العلامات التجارية وأسعارهم تبدأ من 315 جنيه وبتوصل لـ2400 جنيه.

لو الشاطئ بعيد عن مكان الإقامة فدي حاجة صعبة وخاصة لو هتحتاجوا تنقلوا أكل وشرب ومستلزمات البحر معاكم، علشان كده ممكن تشتروا عربة شاطئ علشان ماتتعبوش في نقل متعلقاتكم، وممكن تستبدلوها بحقيبة عادية، وهتلاقوها أونلاين بأسعار تبدأ من 380 جنيه حتى 6000 جنيه.

وبالتأكيد هنفكركم أن الكاب والنظارة من أهم الحاجات اللي لازم تستخدموها على الشاطئ أو الخروج في النهار عمومًا وبيتباعوا في كل مكان وزمان، والأسعار للكابات بتبدأ من 150 جنيه، وللنظارات الشمس تبدأ من 400 جنيه وبتختلف طبعًا الأسعار حسب النوع والمادة المصنعة وخلافه.

ولو أنتم من هواة الألعاب فأكيد لازم تشتروا كل حاجة قبل السفر، لأنكم رايحين تستجموا مش تدوروا تشتروا إيه منين، فألعاب البحر كتير والرحلة حسب نوعها هتحدد تشتروا ألعاب إيه زي الكوتشينة أو سبايك بول أو حتى ألعاب تنشيطية للجسم والعقل، وده هيعتمد على تخطيطكم.

والأهم من كل اللي فات أوعوا تنسوا ملابس السباحة ولازم تكون مناسبة لكم ومثالية علشان تستمتعوا برحلة سعيدة سواء في البحر الأبيض أو الأحمر.

كل سنة وأنتم بكل خير وسعادة.