The Definitive Guide to Living in the Capital , Cairo , Egypt

الصورة الرئيسية: Jakob Owens

الفن رسالة، ومحبي الفن السينمائي والتليفزيوني أكيد بيتمنوا يدرسوا علشان يتعلموا المجال ده بشكل مهني، وحلم الدراسة أصبح ممكن بفضل تجربة مصرية مميزة وهي “المدرسة العربية للسينما والتليفزيون”، اللي بتعلم الفنون من خلال موقع عربي متخصص للتعليم عن بعد، وهنقول لكم خلال السطور الجاية كل اللي محتاجين تعرفوه عن تفاصيل الدراسة في “المدرسة العربية للسينما والتليفزيون”.

صاحبة الفكرة هي الدكتورة منى الصبان، الأستاذة بالمعهد العالي للسينما، وهي مديرة المدرسة، واللي بتسعى لنشر الثقافة السينمائية لكل الناطقين باللغة العربية في أي مكان في العالم.

الدراسة في المدرسة العربية للسينما والتليفزيون مش محتاجة مؤهل معين، ولا مهارات سابقة، وموقع المدرسة هو الأول من نوعه عربيًا في تعليم الفنون السينمائية، والمدرسة تابعة لوزارة الثقافة ومقرها الرسمي في سبيل وكتاب قايتباي بمنطقة القلعة بالقاهرة، والمناهج الدراسية اللي متاحة مجانًا للجميع هي نفسها المعتمدة من المعاهد الأكاديمية للسينما.

من خلال المدرسة هتقدر تتعلم “سيناريو – إخراج – تصوير – مونتاج – صوت”.

الدراسة من خلال الموقع مجانية وسهلة من خلال التسجيل ودراسة المناهج في أي وقت وكل منهج له امتحان خاص به، وصماريف الامتحانات والشهادة رمزية جدًا، والامتحانات بتكون كل ثلاث أشهر، ومدة الامتحان ساعتين، وللنجاح لازم يحصل الدارس على 60% على الأقل من الدرجة الكاملة.

وبعد اجتياز الدراسة والامتحانات هيكون الدارس مؤهل يصنع بنفسه فيلم قصير مدته من 5 حتى 10 دقائق تحت إشراف المدرسة لتطبيق دراسته عمليًا وكمان يمكن المشاركة بالفيلم في المهرجانات العربية والدولية، وكمان بعد نهاية الدراسة بيحصل الدارس على شهادة احترافية في فنون السينما والتليفزيون وتصريح بالعمل من نقابة المهن السينمائية، وده ممكن يفتح الباب للمحترفين في أنهم يشتغلوا بالسينما والتلفزيون أو يصبحوا نقاد فنيين.

وتقدروا تعرفوا أكتر عن مدرسة السينما والتليفزيون من خلال موقعهم الإلكتروني من هنا.