The Definitive Guide to Living in the Capital , Cairo , Egypt

25 أبريل هو ذكرى مهمة، بنحتفل بها كل سنة علشان نفضل فاكرين ذكرى تحرير سيناء، وهو الحدث التاريخي اللي غير حاجات كتير جدًا في وجدان وتكوين الشخصية المصرية، وعلشان الذكرى الجميلة دي حبينا نقولكم على مجموعة متاحف تقدروا من خلالها تتعرفوا على تاريخ الجيش المصري وبطولاته.

متحف القوات الجوية

تقدروا تزوروا معرض الطائرات الحربية الحقيقية بكل قصصها وحكاويها، ودخول الهليكوبتر  (MI – 6)، وتشوفوا عرض تقديمى عن برنامج DAY TO FLY & TRY TO FLY لتعليم طلبة المدارس علوم الطيران، وكمان بتزوروا المبنى الرئيسي للمتحف وفيه سينما ومكتبة وجداريات ولوح فنية ووثائق وصور نادرة بتحكي عن بطولات القوات الجوية منذ عام 1932 وده تاريخ انشائها.

وميفوتكمش زيارة قاعة الطائرة، وقاعة 9D، ومحكى الطائرة F-16، والمتحف مفتوح يوميًا ماعدا الثلاثاء من 9 صباحًا حتى  3 عصرًا، وبيكون فيه جولة داخلية بصحبة مرشد من المتحف بتبدأ الساعة 10 وكل ساعة بيبقى فيه فوج جديد حتى 3 عصرًا، والدخول بيكون من بوابة صلاح سالم، وفيه جراش للسيارات بقيمة 5 جنيه للسيارة.

العنوان: قاعدة ألماظة الجوية – شارع صلاح سالم – أمام الكلية الحربية.

رقم التليفون: 01024028270.

المتحف الحربي

موجود حاليًا بالقلعة، ولكن لما تم بناءه عام 1937 كان مقره في وزارة الدفاع القديمة بشارع الفلكي – وسط البلد، وبعدين اتنقل عام 1938 لجاردن سيتي، وبعدين استقر في منطقة قصور الحرم الثلاث في القلعة عام 1949، وهتلاقوا جواه قواعد بتحكي فترات مهمة في تاريخ مصر، وكل مرحلة لها اسمها زي المجد، والملابس، والمدفعية، والأسلحة، نصر أكتوبر 1973، الشهداء، العصر الفرعوني، العصر الإسلامي، عصر أسرة محمد على باشا وغيرها من القاعات.

المتحف مفتوح يوميًا من 8 صباحًا حتى 6 مساءً، وبيقدم شرح وافي باللغتين العربية والإنجليزية لكل محتوياته، وفيه كافيتريا وستديو تصوير فوري ومحل هدايا وبرجولة للموسيقى العسكرية.

العنوان: قلعة صلاح الدين – السيدة عائشة.

رقم التليفون: 0225129619 – 0225116218 –  0225110955.

بانوراما حرب أكتوبر

الفكرة بترجع لعام 1983، وتم عملها بالقرب من استاد القاهرة، على مساحة 31 ألف متر مربع، وافتتحت رسميًا عام 1989 بالتزامن مع احتفالات أعياد أكتوبر، وبتضم ساحة عرض مكشوف، عبارة عن منصتان للعرض المكشوف، واحدة لعرض نماذج من أسلحة الجيش المصري اللي شاركت في حرب أكتوير 1973، والتانية لنماذج أسلحة تم الاستيلاء عليها، والمبنى الرئيسى عبارة عن مبنى اسطوانى بقطر 44 متر وارتفاع 27 متر، ويعتليه برج من الحديد والنحاس بارتفاع 10.5 متر.

قاعات عرض البانوراما مقسمة لـ5 قاعات، الدائرية، وقاعة 1 ودي فيها أعمال القوات المسلحة منذ عام 67 حتى عام 73 ، وقاعة 2 ودي بيصور المسرح الدائرى فيها ملحمة العبور ، وقاعة 3 فيها أعمال الأفرع الرئيسية للجيش المصري خلال حرب أكتوبر 1973، وقاعة 4 بتضم مكتبة تاريخية مزودة بقاعة للإطلاع، وكل قاعة من دول بتشيل حتى 50 فرد.

البانوراما بتعمل جميع أيام الأسبوع ما عدا الثلاثاء، وفيه حفلات صباحية الساعة “9:30 – 11:00 – 12:30″، وحفلتين مسائية “6:00 – 7:30″، والعروض هناك بتكون باللغات “العربية – الإنجليزية – الفرنسية – الألمانية – الإيطالية – اليابانية – الصينية – العبرية”، وبيتوفر داخل البانوراما كافيه ومحل هدايا وستديو تصوير فوري.

العنوان: طريق النصر – صلاح سالم.

رقم التليفون: 0224028862 – 0224022317.

متحف السكة الحديد

يمكن ده مش متحف عسكري بشكل مباشر، لكنه متحف مهم خصوصًا وأن القطارات في مصر كان لها دور عظيم في نقل الجنود والمعدات الحربية، ومؤخرًا أعلنت هيئة السكة الحديد عن فتح أبواب متحف السكة الحديد بميدان رمسيس للجمهور مجانًا، من الساعة 9 صباحًا ولحد الساعة 2 ظهرًا، وده في إطار مشاركة الهيئة القومية لسكك حديد مصر بالاحتفال بعيد تحرير سيناء.

ومتحف السكة الحديد واحد من أعرق وأقدم متاحف السكك الحديدية في العالم، تم افتتاحه فى 15 يناير 1933، وتمت إعادة تطويره وافتتاحه فى مارس 2016، وبيتيح المتحف لزواره إمكانية التعرف على مراحل تطور السكك الحديدية فى مصر من خلال نماذج لقطارات وعربات من حقب زمنية مختلفة.

العنوان: رمسيس، داخل محطة قطارات مصر.