The Definitive Guide to Living in the Capital , Cairo , Egypt

كلنا بنحب القاهرة! والعاصمة المصرية دائمًا مدهشة، ولها أكثر من شكل حسب المكان والزاوية والارتفاع، وكل رؤية للقاهرة فيها حاجة بتميزها عن الزاوية الثانية، ولكن أجمل رؤية للقاهرة لما تكون من فوق، علشان كده دايمًا بيقال “القاهرة غير من فوق”، وده بمعنى أن لو شفتوا القاهرة من فوق في أي مكان سواء حضري أو عشوائي هتقدروا تشوفوها بشكل مبهر، وعلشان كده هنقولكم على  أماكن مميزة مرتفعة تشوفوا منها القاهرة فرعونية وخديوية وفاطمية.

البداية مع القاهرة الفرعونية واللي تقدروا تشوفوها من فوق مطعم خوفو ومن خلال الفيو اللي هيخليكم تشوفوا الأهرامات وأبو الهول بشكل واضح ومميز، وكمان هتلاقوا الديكور والخدمة عندهم قريبة للقاهرة الفرعونية، بس لازم تحجزوا قبل ما تروحوا، وهما موجودين في نزلة السمان بالهرم.

ومن خلال برج القاهرة هتقدروا تشوفوا القاهرة الخديوية بمبانيها الجميلة  العريقة واللي صممها أكبر وأمهر المهندسين المعماريين في العالم وبقت تحفة فنية في وسط البلد، وهتشوفوا كمان المتحف المصري القديم ونهر النيل وغيرها من الأماكن اللي بدأت تظهر في عهد الخديوي اسماعيل، وبرج القاهرة موجود في شارع الجبلاية بالزمالك.

ومن داخل حديقة الأزهر الفريدة هتقدروا تشوفوا القاهرة الفاطمية سواء من اتجاه السيدة عائشة والقلعة أو من اتجاه الأزهر وشارع المعز، وكمان هتشوفوا منطقة الدرب الأحمر ومجرى العيون بشكل مختلف من ارتفاع مناسب هيخليكم تحبوا مصر وتعرفوا أن مصر من غير فوق، وحديقة الأزهر موجودة في شارع صلاح سالم بالقرب من مشيخة الأزهر.

ولو عاوزين تشوفوا القاهرة بزاوية 360 درجة تقدروا تزوروا المطعم الدوار اللي بيلف بكم بشكل كامل وهتشوفوا منه كوبري قصر النيل والجلاء وأكتوبر والأوبرا وقصر العيني وجاردن سيتي والنيل وغيرها من الأماكن المميزة مع عشاء مختلف لازم تحجزوه قبلها، والمطعم الدوار موجود في فندق جراند نايل تاور – جاردن سيتي.

أما القاهرة بتاعتنا اللي مختلط فيها العشوائي بالحضارة فتقدروا تشوفوها من جبل المقطم وعندكم اختيارين، أما تقفوا فوق جبل المقطم مع نفسكم أو تقعدوا في واحد من المطاعم والكافيهات اللي منتشرة هناك، وهتستمتعوا بالمنظر اللي بيبدأ بمباني متراصة جنب بعض ورغم عشوائيتها إلا أنها مميزة وصولًا لأنكم تشوفوا الأهرامات ووسط القاهرة والأزهر وغيرها من الأماكن اللي هتعجبكم.