هو موسوعة “مصر القديمة”.. اتعرفوا على سليم حسن شخصية معرض الكتاب 2024
شخصية معرض الكتاب 2024 عالم الآثار سليم حسن مين شخصية معرض الكتاب مين هو سليم حسن
Mohamed Talaat
معرض القاهرة الدولي للكتاب هينطلق يوم 24 يناير وهيستمر حتى 6 فبراير في دورته الـ55، ومع كل دورة جديدة بيكون فيه ضيف شرف للمعرض وبيتم اختيار دولة، وكمان بيكون فيه “شخصية المعرض” وده بتختاره اللجنة العليا، والسنة دي وقع الاختيار على العالم الأثري سليم حسن الملقب بعميد الأثريين المصريين وهنتعرف في المقال ده على شخصية معرض الكتاب وأهم المعلومات عنه.
ولد سليم حسن في محافظة الدقهلية عام 1887، والتحق بمدرسة المدرسين العليا، وكان متفوق في التاريخ علشان كده درس في قسم الآثار، وكان أول مصري يعين بالمتحف المصري لأن الوظائف كانت مقتصرة في الوقت ده على الأجانب ولكن الحكومة المصرية ضغطت لتعيينه، وتتلمذ جوا المتحف على يد العالم الروسي “جولنشيف”، وكتب سلسلة مقالات صحفية كثيرة بعنوان “الآثار المصرية في المتاحف الأوربية” وكشف فيها عن سرقات الآثار المصرية وتهريبها للخارج.
حصل سليم حسن شخصية العام في الدورة الـ55 لمعرض القاهرة الدولي للكتاب 2024 على دبلوم اللغات الشرقية والهيروغليفية القديمة من الكلية الكاثوليكية، ودبلوم الآثار من كلية اللوفر، ودبلوم اللغة المصرية، ودبلوم الديانات المصرية القديمة من جامعة السربون، وفور انتهاء دراسته في الخارج رجع مصر واتعين تاني في المتحف المصري، وكمان كان بيدرس علم الآثار في كلية الآداب جامعة القاهرة، وحصل على دكتوراه في علم الآثار من جامعة فيينا عن الحفر والتنقيب في منطقة الأهرامات.
واختيار حسن كشخصية العام في معرض الكتاب 2024 كان بسبب تاريخه في مجال الآثار، وهو له اكتشافات كتير زي أنه أول من بدأ التنقيب في منطقة الأهرامات لحساب هيئة علمية مصرية وكانت البعثة تابعة لجامعة القاهرة، ونتج عن عمليات الحفر المصرية اكتشاف مقبرة (رع ور)، ودي أكبر وأضخم مقبرة كان فيها آثار، وكمان اكتشف 200 مقبرة أهمها مقبرة “الملكة خنت كاوس”، ومقبرة “أولاد الملك خفرع”، وكمان اكتشف مراكب الشمس الحجرية للملكين “خوفو وخفرع” وغيرهم.
من ضمن المناصب اللي تولاها شخصية العام لمعرض الكتاب 2024 وكيل عام مصلحة الآثار المصرية وهو أول مصري يتولى المنصب ده، وأعاد للمتحف المصري قطع أثرية كتيرة كان مستحوذ عليها الملك فاروق ولما حاول يسترجعها رفض وتصدى له وبعدها تركه منصبه كوكيل مصلحة الآثار، وتم تعيينه سنة 1954 رئيسًا لبعثة الحكومة لتحديد مدى تأثير بناء السد العالي على آثار النوبة، وله كتير من المؤلفات أهمها على الاطلاق الموسوعة التاريخية الأشهر “مصر القديمة”
توفى الدكتور سليم حسن في القاهرة سنة 1961.
