حديقة وملاهي وثلج.. 5 أماكن للفسحة في إجازة نصف السنة
جيرو لاند خروجات في إجازة نصف السنة خروجة للأطفال زد بارك سكي مصر فسحة عائلية ملاهي
Mohamed Talaat
خلاص إجازة نص السنة على الأبواب وحاليًا بنقعد نفكر هنقضيها إزاي وهنعمل ايه، وبما أن الأوبشن الأول وهو السفر بره القاهرة مش متاح لكتير مننا قررنا ندور على أماكن ترفيهية مناسبة نستمتع فيها كشلة وعيلة نفك بيها من ضغوط المذاكرة والدروس وزحمة الصبحية واحنا خارجين للدراسة أو الشغل، ووصلنا بعد بحث وتدقيق لـ5 أماكن من وجهة نظرنا مناسبة لخروجة مميزة في إجازة نص السنة هتخلينا نفصل وننبسط.
جيرو لاند
خدوا العربية واطلعوا على العبور واستمتعوا بملاهي جيرو لاند اللي هتلقوا فيها 17 لعبة للأطفال والكبار، وأهم لعبة هنرشحها “بامبا كار” ودي عربيات التصادم اللي بنحنلها مهما مر بينا العمر.
العنوان: مدخل مدينة العبور بجوار كارفور.
تقدروا تعرفوا أكتر عنهم من خلال صفحة الفيسبوك من هنا.
فندق الماسة
لو عاوزين مكان الصورة فيه بألف كلمة، واللعب فيه مختلفة، ففندق الماسة هو اختياركم الأول، لأن فيه ألعاب زي نموذج محاكاة الطيران اللي هتقدروا تجربوا قيادة الطيارة بنموذج محاكاة وكأنكم طيارين بجد، وكمان عندهم منطقة ألعاب للأطفال، وسينما 3D، وسينما عادية، ده غير البينج والبلياردوا والمساحات الخضراء المتميزة.
العنوان: شارع عبد العزيز الشناوي – مدينة نصر.
تقدروا تعرفوا أكتر عنهم من خلال صفحة الفيسبوك من هنا.
سكي مصر
استمتعوا بأجواء القطب الشمالي وألعبوا في الثلج وقابلوا البطاريق في سكي مصر، وهتقدروا تستمتعوا بالألعاب جوا السنو بارك وهتاخدوا دروس للتزلج على الجليد وغير كتير من الفقرات والتصوير اللي هتستمتعوا بكل لحظة جواه.
العنوان: مول مصر –طريق 6 أكتوبر.
تقدروا تعرفوا أكتر عنهم من خلال صفحة الفيسبوك من هنا.
الملاهي
أحدث ملاهي فتحت في التجمع الخامس وفي الغالب بالقاهرة الكبرى كمان، هتستمتعوا بألعاب كتير بباقات مختلفة وأسعار في المتناول ومناسبة لكل الأعمار.
العنوان: طريق العينة السخنة – القطامية – بوابة 5
تقدروا تعرفوا أكتر عنهم من خلال صفحة الفيسبوك من هنا.
Zed Park
عنوان الفخامة والخدمات المتكاملة في الألعاب، ومن أول ما تدخلوا الادرينالين هيعلى معاكم من أصوات الصراخ والضحك وسط الألعاب اللي موجودة، ولكن احنا اخر مرة رحنا كانت الخدمات بتاعة المطاعم والكافيهات فقيرة شوية، فأعملوا حسابكم أنه مكان للعب والانبساط، وأكيد هتنبسطوا وخاصة من ألعاب المغامرة، ولو عاوزين تدخلوا بيت الرعب فلازم قلبكم يكون جامد وهو بالنسبة لينا مبيخوفش بس هتخافوا.
العنوان: شارع الحرية – الحديقة المركزية – الشيخ زايد
تقدروا تعرفوا أكتر عنهم من خلال صفحة الفيسبوك من هنا.
مقترح
فن وثقافة
طبلة الست.. فرقة غنائية بتنشر الفرح وتحيي التراث
حفلات طبلة الست حفلات غنائية في القاهرة +5
الحياة في كايرو
