The Definitive Guide to Living in the Capital , Cairo , Egypt

اللي بنى مصر في الأصل حلواني، يعني مافيش منافس للحلويات المصرية وجمالها، لكن لما نلاقي مكان بيقدم حلويات من دول تانية بتتعمل بأيادي مصرية فلازم نقول على الحاجة الحلوة إنها حلوة، وده اللي بنقوله على M’oishi للحلويات، واللي بينقل لنا تجربة من قلب قرى إسبانيا للقاهرة، وهنقول لكم على تجربتنا هناك بكل تفاصيلها علشان لما تروحوا تجربوا تحكوا لنا رأيكم أنتم كمان.

المكان مميز في ديكوراته وأنهم بيعملوا كل حاجة فريش، والديكور بتاعهم مريح نفسيًا وكل حاجة بتتعمل قدامكم وشايفينها، وبيقدموا مشروبات وحلويات ومأكولات كتير، وإحنا قررنا نجرب صنفين بس من عندهم.

جربنا من عندهم كريم كراميل وسعره كان 120 جنيه، وبيتقدم في كوباية لطيفة ورغم أن الكمية مش كبيرة بس ماكنش مسكر قوي وطعمه مظبوط وحبيناه، يمكن علشان إحنا بنحب الكريم كراميل أو علشان طعم السبونش كيك اللي فيه كان مخليه مميز، بس الأساس ‘حنا حبينا الطعم وطريقة التقديم ويارب ماندمنهوش من جماله 🙂

وتاني حاجة جربناها كانت سان سبيستيان بسعر 120 جنيه، وهي عبارة عن تشيز كيك بدون بسكويت وفيه جبنة كيك ومعمول على طريقة واحدة من قرى إسبانيا الشهيرة، وطعمها كان حلو وعجبنا ومش مسكرة قوي، وكان معاها شوت إسبريسو وعجبنا مرارته الخفيفة، وبحسب كلام فريق العمل هي من مطحنة مخصوص ليهم طبقًا لمواصفاتهم، وكمان كان مع الحلو بولة آيس كريم بس إحنا اتنازلنا عنها ومجربنهاش، وكمان أخدنا معاهم 3 صوص “كراميل” وكان معقول، و”شيكولاته” وسكرها كان بيقرمش في الأكل و”بيستاشيو” كان كويس.

تقدروا تعرفوا أكثر عنهم من خلال صفحة الفيسبوك من هنا.