The Definitive Guide to Living in the Capital , Cairo , Egypt

مهما تطورنا واكتشفنا حقيقة حاجات كتير من اللي بتحصل حوالينا. هيفضل الموت هو السر الأكبر، لإننا مش بنعرف إيه اللي بيحصل بعده. ولو حد رحل عنا ومعاه أسرار مش هنقدر نسترجعها منه. لكن فيلم Talk to Me بيستخدم الخيال علشان يقدم لنا سرد مختلف.

فيلم Talk to Me بيحكي عن “ميا” (قامت بالدور صوفي وايلد) اللي بتعاني نفسيًا بعيد رحيل والدتها الصادم لها ولعائلتها. ونتيجة صدمتها، بتبدأ تعيش حياتها مع مجموعة من الأصدقاء في محاولة للعودة لشكل حياتها التقليدي. لكن حياتها بتنقلب رأسًا على عقب لما بتشارك في تجربة، بيدفعها لها أصدقائها، بتخليها تلمس يد مسحورة، واليد دي لها القدرة على استدعاء الموتى من العالم الآخر. الأمر اللي بيضعها في تجربة مخيفة بتحاول تخرج منها بأي شكل.

كان لنا فترة طويلة بنعاني من أن الأفلام المرعبة كلها أًصبحت شبه بعضها بشكل كبير، لكن الموضوع في Talk to Me مختلف شوية، لأننا المرة دي مش بنشوف رعب قائم على المشاهد المفاجئة أو الـ Jump scares زي ما إحنا متعودين. لكن المرة دي بنشوف كمان رعب نفسي، قائم على سؤال المشاهد لنفسه: لو أنا مكان “ميا” كنت هعمل إيه؟

الأداء التمثيلي لمعظم أبطال الفيلم ممتاز خاصة أن فيه رسالة ضمنية من الأحداث موجهة للمراهقين بالأساس، وهي إن الانسياق وراء الأصحاب في كل حاجة مش أمر صح، وإنه ممكن يتسبب في مصائب. ممكن نشيل اليد المسحورة ببساطة ونستبدلها بالكحول أو المخدرات مثلًا.

مخرجي الفيلم مايكل وداني فيليبو هما بالأساس صناع محتوى على يوتيوب، وأخدوا فرصتهم لصناعة الأفلام مع Talk to me بالتالي نقدر نقول براحتنا إنهم قدموا جديد بجد وأن كان لهم وجهة نظر مختلفة في الفيلم، جعلته من أفضل أفلام الرعب اللي شوفناها مؤخرًا.

لكن من ناحية تانية ضايقتنا الإضاءة القليلة في كثير من المشاهد. وحسينا أن الإضاءة القليلة معمولة مخصوص لتمرير الخدع السينمائية وتسهيلها على المخرجين. ولو خيرونا بين إضاءة عادية وبين خدع سينمائية كتير، كنا هنختار الإضاءة على حساب الخدع، لإنها فعلًا أثرت على تجربة مشاهدتنا بشكل كبير وإن كانت حركة الكاميرا وزوايا التصوير كانت مختلفة وجيدة وتستحق الإشادة.

الخلاصة: فيلم Talk to me فيلم رعب مختلف عن باقي سياقات أفلام الرعب، بيقدم أداء تمثيلي يُحترم وحركة كاميرا تحترم. لكن كان هيكون أفضل لو كانت الإضاءة أحسن.