عمارة “دي تريستا”.. جمال وتاريخ في وسط البلد
القاهرة عمارات تاريخية في وسط البلد عمارة دي تريستا مباني القاهرة مصر وسط البلد
Cairo 360
عمر مراد
مهما الدنيا تطورت من حوالينا، هنلاقي نفسنا في أوقات كتير بيكون عندنا حنين للماضي، ولكل حاجة بتحسسنا بالزمن الجميل، ولو كنا بنحس بإعجاب لما بنشوف المباني الحديثة، خصوصًا الفخمة منها، هنلاقي نسفنا بنحس بانبهار وحنين لما بنشوف المباني القديمة. ووسط البلد فيها مباني عظيمة، بطعم تاريخ القاهرة الجميل، ومنها عمارة عمارة “دي تريستا”، المعروفة كمان باسم عمارة “أسيكيورازيوني”، واللي بتقع في منطقة البورصة المتفرعة من شارع قصر النيل.. تعالوا نعرف حكايتها.
العمارة بناها المهندس الإيطالي العظيم “أنطونيو لاشياك” في 1911، وكان وقتها كبير مهندسين قصر الخديوِ وساب بصمات كتير في العمارة بتحكي عن فنه ومهارته، زي الكنيسة البطرسية بالعباسية والمقر الرئيسي لبنك مصر وقصر الطاهرة وكتير من الأماكن.
بناء العمارة مولته شركة تأمين إيطالية وفضلت تابعة لها فترة كبيرة لحد ما انتقلت ملكيتها للحكومة المصرية. اتميزت بالبناء المختلف وخلطت بين الطراز الأوروبي والمصري مع بعض علشان كده جمالها الخارجي هيشد عينك لما تبص عليها، وهتلاقي رسوم كتير منقوشة عليها وزخارف إسلامية ونقوش أوربية.
ولما تدخل العمارة هيخطفك جمالها الداخلي وهتحس برائحة من الزمن الجميل. العمارة مساحتها حوالي 1330 متر وبتتكون من 5 طوابق إدارية.
ولأن المكان تحفة معمارية قررت الحكومة المصرية في عام 2015 تجدده علشان كل عشاق الجمال المعماري يحسوا به.
عنوان العمارة: 12شارع علوي بمنطقة البورصة المتفرع من شارع قصر النيل.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
