The Definitive Guide to Living in the Capital , Cairo , Egypt

كام مرة حسينا إننا مش في المكان الصح؟ كم مرة حسينا إننا عايشين حياة مش بتاعتنا مع ناس مش فاهمانا، ناس مضطرين نشرح لهم كل موقف بنعمله، ونفسر لهم معنى كل كلمة قولناها. ناس مش بتفهمنا من أول نظرة، مش بتحس بينا من غير مانتكلم. زي جهازين راديو بس مش مظبوطين على نفس الموجة؟

نقل فؤادك حيث شئت من الهوى ** ما الحب إلا للحبيب الأول.

كم منزل في الأرض يألفه الفتى ** وحنــــينه أبدًا لأول منزل.

الشاعر أبو تمام (803-845م)

فيلم Past Lives بيبدأ بمشهد افتتاحي لراجل وست من أصول أسيوية، بيتكلموا مع بعض، بينما قاعد معاهم راجل من أصول أمريكية مش بيشارك في الحوار، وواضح عليه عدم الفهم أو حتى عدم الاهتمام.

بعد كده بينتقل بينا الزمن في الفيلم لأكتر من عشرين سنة في الماضي، علشان نشوف إزاي العلاقة بدأت بين نورا وهاي سونج اللي شوفناهم في بداية الأحداث. وإزاي فرقتهم الدنيا بسبب هجرة نورا من كوريا الى أمريكا، وبعد سنين من الفراق بيجمعهم الحب تاني.

الجميل في Past Lives أنه بيتماس مع قصة الحب الأول في حياة كل واحد فينا. الحب العذري اللي حسينا بيه في المدرسة الابتدائية، لكن المرة دي بنشوف إيه اللي ممكن يحصل لو استمر الحب معانا لحد ما بنكبر.

عجبنا قوي كمان المشاهد اللي فيها تواصل إلكتروني، وعجبنا تركيز المخرجة سيلين سونج على التفاصيل في المشاهد دي، حتى أنها استخدمت تليفونات قديمة وأجهزة لابتوب يرجع عصرها للوقت ده فعلًا. علشان المشاهد لا يشعر بالغربة وهو بيتفرج.

الأداء التمثيلي لأبطال الفيلم جريتا لي وتيو يو كان أكتر من رائع، وكانوا بيلعبوا في منطقة السهل الممتنع، بمعنى أننا لما نتفرج على تمثيلهم نحس أنهم مش بيمثلوا، بينما هم بيقدموا أداء مدهش بدون مبالغة. وبشكل عام ده نهج Past Lives كفيلم طوال الوقت؛ قصة مباشرة بطريقة حكي بسيطة ومُختصرة، لكن التركيز على المشاعر ونظرات العيون والقرارات الصغيرة اللي بتأدي لنتائج كبيرة كان هو المسيطر طول الوقت.

نهاية فيلم Past Lives كانت صادمة شويه لنا. مش هنحرقها عليكم طبعًا. لكن كتير من المشاهدين مش هيقدروا يتحكموا في دموعهم، لأن الفيلم مش بس بيستعرض قصة رومانسية، القصة دي مشابهة وبتلمس قصص كتير مر بيها كل واحد من المشاهدين تقريبًا، بالتالي حسينا بالتوحد مع أبطال الفيلم. ودي أحلى حاجه عجبتنا في Past Lives.