The Definitive Guide to Living in the Capital , Cairo , Egypt

الفترة دي المصريين بيستعدوا للمدارس، ومن أهم خطوات الاستعدادات هي شراء المستلزمات المدرسية، زي الأقلام والكشاكيل وغيرها، لكن هل تعرف فين أرخص أماكن بيع الأدوات المدرسية في القاهرة؟ في الموضوع ده هنعرفكم على خريطة أرخص أماكن في القاهرة هتلاقي فيها كل اللي أنت محتاجه من منتجات العودة إلى المدارس.

معارض “أهلًا مدارس“

 مجموعة معارض موفرة بتقدمها وزارة التموين بالتعاون مع الغرف التجارية ومحافظة القاهرة، بتوفر الأدوات المدرسية والمكتبية بأسعار معقولة مقارنة بالسوق.

اعرفوا أماكن المعارض من هنا.

حارة الصنادقية

دي حارة متفرعة من شارع الأزهر، هتلاقي فيها أغلب الأدوات المدرسية اللي أنت بتدور عليها، وبسعر معقول فعلًا.

ميدان العتبة

رغم الزحام الشديد والفوضى، لكن تظل العتبة من أبرز الأماكن وأسهلها من حيث الوصول اللي بتوفر منتجات كتير بأسعار رخيصة، وفعلًا كل اللي بتدور عليه من منتجات العودة إلى المدارس هتلاقيه هناك، ومنها الأدوات المدرسية والأحذية والملابس المدرسية والشنط.

سور الأزبكية

لسة في العتبة؟ اسأل هناك على سور الأزبيكة، المكان اللي أصبح عاصمة الكتب الخارجية في القاهرة، هناك هتلاقي كمان كتب مستعملة بسعر أرخص بكتير من الكتب الجديدة. كمان السور فيه أدوات مدرسية مختلفة بسعر معقول وأرخص من بره.

الفجالة

هي أشهر مكان في القاهرة هتلاقي فيه كتب خارجية وكشاكيل بكافة أنواعها وأحجامها وكمان شنط وأدوات مكتبية مختلفة.

من مميزات الفجالة إن فيها محلات بتبيع بسعر الجملة.

شارع الموسكي

الشارع هتلاقي فيه شنط مدرسية بكافة الأشكال والأنواع، ده غير ملابس المدارس المختلفة بسعر أقل كتير من سعر بيعها في المدارس.

ميدان الجيزة

 في ميدان الجيزة هتلاقي تشكيلة كبيرة جدًا من الأدوات االمدرسية بسعر رخيص.