The Definitive Guide to Living in the Capital , Cairo , Egypt

عمر مراد

اللي بنى مصر كان في الأصل من الدرب الأحمر، أميز أحياء القاهرة من زمان، وده لأن فيها خير يغطي الدنيا كلها، خير في أهلها ومبانيها وتفاصيلها وحكاياتها، ورغم أن القاهرة كلها حواديت وقصص وكل حارة وشارع حكاية إلا أن الدرب الأحمر مميز في كل تفاصيله ومبانيه ودروبه، علشان كده لازم نقول إن اللي بنى مصر كان في الأصل من الدرب الأحمر.

حي الدرب الأحمر اتنبى من أكثر من 1000 سنة، وسبب التسمية إن المكان فيه دروب كتير، وفيه رواية بتفسر كلمة “أحمر” في اسمه بإنها بترجع لزمن حادث مذبحة القلعة، اللي عملها محمد علي سنة 1811، وكانت الدماء بتغطي أحذية الجنود وقدرت تخلي الأرض كلها لونها أحمر، ولكن فيه رواية تانية متداولة بتقول إن سبب التسمية كان أن الفاطميين الحمر سكنوا المكان ده وعلشان كده بقى أسمها “الدرب الأحمر”.

هنا خريطة الأماكن الأثرية المهمة! بيحيط بالدرب الأحمر حي الجمالية شمالًا، والموسكي وعابدين والسيدة زينب غربًا، وحي الخليفة جنوبًا، وطريق النصر شرقًا، وبيضم شوارع مهمة في مصر أهمها شارع بورسعيد وشارع القلعة وشارع المعز، كمان بيضم شوارعه “سوق السلاح – الجنباكية “السروجية – المرداني – التبانة – المغربلين – أحمد ماهر – الدرب الاحمر”، ده غير حارة الروم ودرب الدالي حسن ومنطقة السروجية وقصبة رضوان اللي هي الخيامية حاليًا.

وبيتميز حي الدرب الأحمر بجمال مبانيه وتقسيم شوارعه العريقة وبيضم أكبر أماكن أثرية اسلامية في العالم بلغت 56 أثر أهمهم على الاطلاق “المسجد الأزهر”، والمتحف الإسلامي وغيرهم.

في كايرو 360 قررنا نختار 5 أماكن مميزة في الدرب الأحمر نتمنى تزوروهم وتستمتعوا بجمالهم، وكمان ماتنسوش وأنتم في الدرب الأحمر تشتروا بسبوسة الحلمية اللي من أفضل أنواع البسبوسة بالسمنة البلدي في القاهرة وكمان تزوروا شارع السلاح والكحكيين.

بيت يكن

موجود في منطقة سوق السلاح، وبني في القرن الـ17 على الطراز المملوكي والباروك التركي، ويعتبر من أجمل البيوت اللي أهداها محمد علي لابن أخته أحمد باشا حسن والي مكة وقائد الجيوش، وتنقلت ملكية البيت من شخص لآخر لحد ما أصبح مخزن للحوم، ولكن تم انقاذه على يد الدكتور علاء الحبشي اللي رممه وأعاده للحياة مرة أخرى، والنهاردة تقدروا تزوروا بيت يكن وتستمتعوا بتفاصيل بناءه المميزة.

العنوان: زقاق الحمداني – سوق السلاح.

مسجد قيسون

أمر ببناءه الأمير سيف الدين قوصون الساقي الملكي، وهو تحفة معمارية إسلامية، تعرض للكثير من الحوادث داخله لدرجه أنه في فترة زمنية لم يتبقى منه سوى بابه وبعض من شبابيكه، لغاية ما قام الخديو عباس حلمي الثاني تجديده مرة أخرى، وكان من أهم الأحداث اللي مرت على المسجد إمامة الملك فاروق للمصلين به وفي وقتها كان حدث كبير وبارز.

العنوان: عطفة المحكمة.

حديقة الأزهر

“جنة في قلب القاهرة”.. بخضرتها وجمالها الباهر هتشدك ليها، الحديقة اتكلفت مبالغ كبيرة وصلت ل 100 مليون جنيه، موجودة على مساحة 72 فدان، ومن جمالها صُنفت من أفضل 60 حديقة بالعالم، تقدر تقوم بأنشطة رياضية كتيرة بالحديقة، ولو بتحب المسرح والموسيقى هتلاقيها في المسرح المخصص لكدا في الحديقة.

العنوان: طريق صلاح سالم بالقرب من القلعة.

مسجد ومدرسة أم السلطان

من حب السلطان أشرف زين الدين شعبان (السلطان شعبان) لها، قرر يبني لوالدته مسجد باسم “مسجد أم السلطان” واتحول بعد كدا لمجمع إسلامي كبير بيضم مدرسة لتعليم الأطفال القرآن، وعلى جانب إيواني ضريح أم السلطان والسلطان.

العنوان: شارع باب الوزير.

زاوية الشيخ سعود

هي زاوية بترجع للعصر العثماني تتميز بطرازها المختلف، أمر ببنائها سليمان باشا الخادم للشيخ سعود وكان من أشهر المجاذيب وقتها، ودفن بها وعلى مر التاريخ شهدت كتير من الأحداث ولم يتبقى منها الآن سوى قبتها وبعض النقوش عليها، تقدروا تزوروها وتشوفوا تفاصيلها.

العنوان: شارع سويقة العزى بسوق السلاح.