The Definitive Guide to Living in the Capital , Cairo , Egypt

طول الوقت فريقنا بيدور على نماذج ناجحة علشان يسلط الضوء عليها، والنهاردة عندنا نموذج إيجابي، لفتاة مصرية الصدفة خلتها تبدع وتشتغل في مجال الشموع، وعملت براند كمان على اسمها “شموع وردة”، هدفها منه تقدم منتجات شموع بمواصفات فنية عالمية وبسعر معقول. تعالوا نتعرف أكثر على “وردة” وشموعها الحلوة.

وردة رمضان خريجة نظم معلومات إدارية دخلت مجال الشموع بالصدفة، وهي بتسكرول على فيسبوك شافت ريلز تعليمي عن صناعة الشموع فوقفت وفكرت وقررت أنها تتعلم فن صناعة الشموع الهاند الميد، وخاصة أنها بتحب الديكورات المنزلية والحاجات البسيطة اللي بتخلي شكل البيت أجمل.

بدأت وردة تدور على الماتيريال وبتتباع فين، ولما تعمقت في الموضوع اكتشفت أن كتير من الناس بيستخدموا خامات صناعية، ومعروف عن الشموع دي أنها مضرة، ومن هنا قررت تدخل تحدي مع نفسها بأنها تدور على مواد آمنة وصحية وشكلها مميز ومش مضرة نهائي على المستخدم ومن هنا لجأت لاستخدام شمع صويا طبيعي 100%.

وبتفتكر وردة أول مرة عملت فيها شمعة، وكان عندها إحساس غريب ومش مصدقة أنها قدرت تعمل منتج هاند ميد بيتعمل مخصوص وبيتدفع فيه فلوس خاصة أنها أول مرة تفكر تشتغل وتاخد فلوس على حاجة بتعملها، ولكن كان عندها راحة وحب للخطوة، وده زود ثقتها في نفسها وخاصة مع رد فعل الناس على منتجاتها ووصفهم ليها بالمختلفة والحلوة، وحاليًا كل مرة بتشتغل فيها أوردر بتكون مبسوطة أكتر، ومابقاش عندها قناعة أن فيه حاجة تقدر تبسطها قد شغلها.

سرحت “وردة” شوية وقالت لنا إن كل تفصيلة في الشمعة بتديني جرعة انبساط، من أول ما بشتري الحاجة واختارها بنفسي لحد ما أسلمها للعميل أو أعرضها على الصفحة.

منتجات وردة أسعارها مختلفة، وبتكون حسب الحجم، بس بتبدأ من 50 جنيه وبتوصل لحد 600 جنيه للأحجام الكبيرة واللي بتقدمها الشركات الكبيرة بأضعاف السعر ده، وهي بتحاول طول الوقت تقدم أفضل جودة بسعر معقول بدون ما تقلل من الماتيريال أو التفاصيل المهمة الصغيرة، وبتعتمد أن أهم حاجة في الشغل الجودة.

تقدروا تعرفوا أكتر عن شموع وردة من خلال صفحة الفيسبوك من هنا.