The Definitive Guide to Living in the Capital , Cairo , Egypt

رنا شرف

العيد فرحة وأجمل فرحة، ورغم إن العيد بيحب الخروجات، لكن بعض الناس بتفضل القعدة في البيت واستغلال الإجازة في الراحة من تعب الشغل والمواصلات والزحمة. ولو كنت هتقضي العيد في البيت، خلينا نقول لك علي شوية أفكار عملية علشان ماتحسش بالملل.

إفطار العيد

إفطار العيد مهم يكون فتة ولحمة ورقاق، أيوة ماتستغربش، فتة اللحمة، سواء كانت بالصلصة أو بالخل والثوم، هي أحسن روشتة للروقان والبهجة.

أفلام.. ومسرحيات

فيه مجموعة أفلام ومسرحيات أصبحوا من علامات العيد المسجلة، ينفع العيد يعدي من غير ما نشوف مسرحية شارع محمد علي أو ريا وسكينة وغيرهم؟ أكيد لأ طبعًا، لو أنت من عشاق الأفلام والمسرحيات يبقى العيد فرصة تشوف فيه عمل كوميدي يخليك تضحك من قلبك. ويا سلام لو ده حصل مع طبق فشار! متعة.

عزومات.. عزومات

العيد يحب العزومات، اعزم حبايبك على أكلة حلوة أو حتى قعدة فرجة على فيلم أو مسرحية، طول ما البيت في العيد فيه الحبايب والغاليين يبقى ده أحلى عيد. وخليك فاكر، بما إن اللحكمة كدة كدة موجودة، فالعيد فرصة حلوة لعزومة ماتتنسيش لحبايبك وقرايبك.

تسالي العيد

العيد أجمل مع اللب والسوداني والكاجو وطبق ترمس كده مالوش حل! وآه لو بتستمتع بالتسالي دي وأنت في البلكونة بتتفرج على فرحة العيد في الشوارع أو وأنت بتتفرج على الزعيم عادل إمام وباقي العظماء في مسرحية “العيال كبرت”.

نوم بلا حدود

النوم أحيانًا بيكون علاج لحاجات كتير، نام وهتصحى كويس بإذن الله J

عيد سعيد على كل اللي هيقضوا العيد في البيت!