The Definitive Guide to Living in the Capital , Cairo , Egypt

مؤخرًا، أصبح من العادي أنك تكون ماشي في شوارع العاصمة المصرية، فتلاقي حواليك شباب وبنات طايرين على “سكيت”، وبيجروا حوالين منك! انتشرت اللعبة دي خاصة في محيط وسط البلد والزمالك والدقي، وهي لعبة رغم أنها تبان خطيرة ولكن دي في البدايات بس، لكن لما تتقنوها هتكون سهلة جدًا وترفيهية بشكل كبير. تعالوا نعرف إزاي تبدأوا وفين تتعلموا ركوب السكيت في القاهرة.

أولًا متوسط أسعار السكيت بتكون ما بين 350 جنيه وحتى 1500 جنيه، والجميل أنكم في البداية مش شرط تشتروا سكيت علشان تتعلموا لأنه بيتأجر عادي لو قررتوا تروحوا مكان تتعلموا فهتلاقوه متاح للإيجار وفيه نوعين هما الأكثر شهرة “البيني”، و”الباتيناج”، والإيجار بيكون من 35 حتى 50 جنيه.

الشوارع

من أهم الأماكن اللي ممكن تتعلموا فيها هي “الشوارع”، وده حقيقي، لأن في كل منطقة هتلاقوا مجموعة بيعلموا ركوب السكيت، وبيوفروه كمان للإيجار، ومنها منطقة الساحة خلف مبنى الملحق الثقافي للسفارة السعودية في الدقي، وفي وسط البلد موجودين في ميدان طلعت حرب وميدان التحرير، وكوبري قصر النيل وكورنيش النيل أمام ماسبيرو، وفي شارع شريف عند البنك المركزي.

وفي الزمالك موجودين في شارع أبو الفدا وقدام ساقية الصاوي، وأماكن تانية مختلفة.

Skatopedia Skating

صاحبة الأكاديمية آلاء المهدي بتلعب سكيت من سن 5 سنين، وبدأت تدريب من سن 13 سنة، وبدأت بنادي المعادي، وحاليًا عندها أماكن كتير بتدرب فيها وأصبحت من أشهر العاملين والمحبين لمجال التزلج عمومًا، ووصلت لأنها تعمل دورات بره مصر كمان.

تقدروا تعرفوا أكتر عنها من خلال صفحة الفيسبوك من هنا.

Futures Skating

مش مجرد مكان للتعليم ولكنه أكاديمية للبطولات المحلية والدولية، وعندهم فروع في مصر الجديدة والمعادي والتجمع ومازالوا بيتوسعوا وبيفتحوا فروع لتعليم الشباب وكمان تأهيلهم للبطولات.

تقدروا تعرفوا أكتر عنهم من خلال صفحة الفيسبوك من هنا.

Cairo Skaters Team

هو كومينتي مش مجرد مكان هتتعلموا فيه، لأنه بيساعدكم تكسروا حاجز الخوف وبيعمل أنشطة مخصوص للمبتدئين وبيساعدهم يبقوا محترفين وبيساعد الناس على أنها تبقى متمكنة في اللعبة وشراء الأدوات والتدريب وكل حاجة.

تقدروا تعرفوا أكتر عنهم من خلال جروب الفيسبوك من هنا.

Horizon Skate‎‏‎‏

موجودن في روض الفرج وبيعلموكم الأول في مكان مغلق لحد ما تكتسبوا ثقة وتبقوا متمكنين من اللعبة، وهما من الأماكن اللي يقال عليها “ثقة” في تعليم الشباب.

تقدروا تعرفوا أكتر عنهم من خلال صفحة الفيسبوك من هنا.