The Definitive Guide to Living in the Capital , Cairo , Egypt

يمنى أحمد

سواء كنت على شاطئ جميل، أو في حديقة مفتوحة، أو حتى مأنتخ في البيت، فيه حاجات كتير ممكن تعملها علشان ترتاح بجد من ملل الشغل وضغطه. الكتب وسيلة عظيمة للهروب من الواقع القبيح، ولتغيير الموود، خصوصًا لو كتب حلوة، سهلة القراءة، وقادرة تخلينا نضحك معاها من قلبنا وكمان ناخد معلومة جديدة. في السطور الجايه كايرو 360 هترشح لك 5 أعمال ممكن تقرأهم وتضحك من قلبك وكمان هيشكلوا فارق في تفكيرك.

كتاب بعد ما يناموا العيال

عمر طاهر هو صاحبك اللي دايمًا يونسك بحكاويه، بيقدر يخرجك من كل تفكيرك ويشغلك معاه في كلماته، وبتكتشف إن وقتك ما ضاعش وإنك انبسطت من قلبك والبسمة منورة وشك، في “بعد ما ينامو العيال” بيسلط الضوء على حياة المصريين العادية، بيدور بيك في الزمان فتفتكر طفولتك والمكان، فتشم ريحة الونس من بين السطور وأنت بتفتكر المشهد الفلاني المشابه ليك حصل لك في أي مكان، من الآخر أقدر أبصم لك بالعشرة إن الكتاب ده مختلف.

كتاب لهذا نحب

ده كتاب بيجاوب على سؤال محير في عقل كل حد فينا، إحنا ليه بنحب؟ ونعرف إمتى إننا بنحب؟ مش بس هينور لك الطريق علشان تكشف إجابة السؤال ده لنفسك، ولكنه هيعرفك نقطة مهمة وهيا إن الحب ده له أشكال كتير جدًا، أهمها إنك تقدر تحب نفسك، علشان تشوف حب اللي حواليك. مجموعة قصص بأسلوب رشيق هينسوك عناء الأيام وضغط الشغل.

كتاب بالطو وفانلة وتاب

وأكيد الشهر اللي فات عدى عليك مسلسل بالطو اللي طلع تريند، طبيعي هتكون محتاج تعرف الحكاية الأصلية اللي مذوقتهاش الدراما ولا أضافت ليها بهارات، وده متاح عن طريق قراءة الكتاب نفسه. أحمد عاطف هنا بيتكلم عن حياته بعد التخرج كطبيب امتياز في إحدى الوحدات الصحية، بيبروز لك المشاكل وتعامله مع المواقف بطريقة سهلة، مرحة، والأهم هتتعلم أنت كمان منها.

كتاب يوميات مدرس في الأرياف

في الكتاب ده بقى هتتأكد بنفسك من الوضع الدراسي في مصر عن طريق تجربة مدرس اللغة العربية واللي قرر يطلعها هنا على هيئة نصايح، طبعًا الكتاب مفيد لأي علشان يقدر يتابع بنفسه مستوى الأطفال التابعين ليه في المدارس، وأحلى حاجة بتميز الكتاب ده هو أسلوبه الخفيف أوي، والنكات اللي بين السطور واللي هتهون عليك كتير وهتعيش معاها وقت لطيف.

كتاب الحب في رغيف

وده كتاب ساخر، من أروع الكتب المسلية واللي هتدخل على قلبك البهجة بشكل مش طبيعي لأنك هتدمع من الضحك، مش بس كده كمان الكتاب واقعي وهيتكلم عن اللي بيحصل في العلاقات بين الطرفين، أسلوبه سلس وهيدخل دماغك جدًا، جرب تقرأه.