The Definitive Guide to Living in the Capital , Cairo , Egypt

مطروح من المحافظات الساحلية المميزة والجميلة، وحاليًا هي اختيار كويس لكل اللي بيدور على مصيف نظيف وهادئ بعيدًا عن الزحمة. بتتميز مرسى مطروح بجمال المياه الصافية والنقية.. وبما أن الصيف خلاص بدأ، فقررنا نعرفكم على أهم 7 شواطئ في مطروح علشان لما تخططوا تبقوا عارفين هتروحوا فين للاستمتاع باثنين سواء، وهما المياه والهواء.

شاطئ البوسيت – “الليدو”

منطقة الليدو والبوسيت الشاطئ بتاعها مميز والمياه فيه جميلة، وفيه لسان ما بينهم لازم تتمشوا فيه في وقت الغروب وهتستمتعوا جدًا.

شاطئ الهنا

هو أقرب شاطئ لوسط مدينة مرسى مطروح، والمياه فيه صافية ونضيفة، والرملة ناعمة، وكمان مناسب جدًا للأطفال لأن الموج بتاعه هادي، وهو الشاطئ المفضل لكل المصيفيين.

شاطئ روميل

الموج هناك هادي جدًا فيه ويعتبر معدوم، وده مناسب للأسر اللي عندها أطفال أكتر، وروميل بيتميز أن بيكون فيه ركوب عجل ومليان قعدات بدوية وكافيهات لخروجات ليلية مميزة.

شاطئ العوام

موجود في وسط البلد “شارع إسكندرية”، والمياه فيه مناسبة للكبار والأطفال ومافيش خطر فيه وكعادة مطروح مياة البحر نقية.

شاطئ كليوباترا

رغم أنه يبعد عن شارع إسكندرية حوالي 12 كيلو إلا أنه من الشواطئ المميزة، والجميل فيه أنه مقسم، جزء فيه مناسب للأطفال والموج هادئ فيه، والجزء الثاني الموج فيه عالي جدًا، وغير مناسب للأطفال تمامًا، ولكن الفيو بتاعه حلو للتصوير وكمان فيه حمام كليوباترا الشهير.

شاطئ الغرام

وشهرته شاطئ “ليلى مراد”، ودي الوجهة المفضلة للمصيفين وهناك هتشوفوا صخرة ليلة مراد، ولكن خلوا بالكم الصخرة مبقتش قريبة زي زمان لأن المد خلاها جوا شوية، والشاطئ ده يبعد عن شارع إسكندرية تقريبًا 15 كيلو، ورملته ناعمة جدًا.

شاطئ الفيروز

أهل مطروح بالنسبة ليهم الشاطئ ده بحيرة مش بحر لأن الموج بتاعه هادئ جدًا، وهو قريب من منطقة روميل، وآمن جدًا على الأطفال، والشاطئ فيه برج غنيوة وكافيهات وبرجولات خاصة والقعدة فيه للاستجمام مختلفة عن أي مكان في مطروح.

وشواطئ مطروح كتيرة ومميزة كلها، ولكن دول أهم شواطئ من وجهة نظر أهل مطروح نفسهم، ومتنسوش تزوروا منطقة الأبيض اللي فيها 7 شواطئ، ولو حابين المغامرة تقدروا تروحوا غرب مطروح لشاطئ أم الرخم.