The Definitive Guide to Living in the Capital , Cairo , Egypt

بحيرة عين الحياة هي بحيرة موجودة في منطقة الفسطاط وبالتحديد في طريق الخيالة، وهي عين كبريتية كانت مهملة ومش معروفة، ولكن تم تطويرها، وحاليًا بتضم مطاعم وكافيهات وقعدات مختلفة، وفيها ممشى سياحي على البحيرة بطول 2.5 كيلو متر، وحاليًا فيه خيمة رمضانية موجودة هناك اسمها “عين الحياة” على نفس اسم البحيرة الجميلة. رحنا جربناها ورغم صعوبة الوصول إلا أننا انبسطنا.

خلال السطور الجاية هنقول لكم على كل اللي محتاجين تعرفوه عن خروجة “عين الحياة”.

أولًا، بحيرة عين الحياة قريبة من بحيرة القاهرة بالفسطاط، والحقيقة إحنا كنا متلخبطين بينهم، لكننا اكتشفنا إنها مكان مختلف خالص، وقدرنا نوصل بسهولة من خلال الـGPS، فقط كتبنا بحيرة “عين الحياة”. هي تحت كوبري الفسطاط اللي بيودي على الدائري.

لما تدخلوا المكان هتلاقوا ديكورات رمضانية مميزة مصنوعة من النيون، وسط ساحة انتظار السيارات، وفي المنتصف خيمة رمضانية معمولة من الخيامية والقعدات بتاعتها فيها جزئين، جزء عربي، والتاني كلاسيكي بزيادة، وفيه شاشة عرض ومسرح علشان كل يوم عندهم حفلة بتبدأ الساعة 10 بالليل.

وفي الأوبن إيريا هتلاقوا كمان قعدات في مختلف الأماكن لكنها مش بتطل على البحيرة، وبرضه فيه شاشة عرض، والمكان في المجمل ديكوراته وتجهيزاته ممتازة وهتنبسطوا منها.

الحجز عندهم للإفطار والسحور بدفع مقدم، سواء من خلال فودافون كاش أو في المكان نفسه، وطبعًا ده شيء مش لطيف ومش محترف، ولكن إحنا كنا عاوزين نجرب المكان فدفعنا عربون عن طريق فودافون كاش، وبعد ما وصلنا نزل الأكل اللي كنا حاجزينه وهو شوربة لسان عصفور باللحمة وسعرها 35 جنيه، ورغم أنها جت لنا بالفراخ إلا أنها كانت كويسة وتغاضينا على اللخبطة دي، وكمان طلبنا سلطة خضراء وكان سعرها 18 جنيه، والوجبات أساسًا بيكون معاها سلطة خضراء وطحينة ومشروب رمضاني وحظنا طلع عناب “كركديه” وطعمه كان حلو.

الوجبة الأساسية اللي طلبنها كانت بيكاتا رومي وسعرها 240 جنيه، وطعم البيكاتا بالرومي كان لطيف وعجبنا، وكان عليها مشروم ومعاها بطاطس محمرة وكمان أرز أبيض والطبق عجبنا.

كمان طلبنا طاجن تورلي بالفراخ، وسعره 195 جنيه، ورغم أن الطاجن كان مالح حبتين إلا أنه كان طعمه شغال، والأرز كان حلو والفراخ كانت متبلة ومستوية كويس.

خلصنا أكل وتصوير في المكان وقررنا نشرب قهوة وكان سعرها 30 جنيه، والقهوة كانت حلوة والأكيد أن جودة البن عالية.

تجربتنا كانت مميزة جدًا وانبسطنا من المكان والأكل، وبننصحكم تخوضوا التجربة دي.

العنوان: طريق الخيالة – الفسطاط الجديدة – مصر القديمة.

رقم التليفون: 01202411160.

تقدروا تعرفوا أكتر عنها من خلال صفحة الفيسبوك من هنا.