5 أماكن تشتري منهم ديكورات لشهر رمضان 2023
اشتري ديكورات رمضان ديكور رمضان رمضان 2023 شراء ديكورات رمضان
Cairo 360
رنا شرف
رمضان هو شهر السعادة والخير والعبادة، دائمًا بنستنى قدومه من السنة للسنة. علشان كده بنحتفي بيه بكل حب، ولأنه مميز بيبقى استقباله كمان مميز. في السنين الأخيرة أنتشرت الديكورات الخاصة برمضان، مش بس فانوس وزينة، لأ ده صواني وأطباق وخداديات ومفارش سفرة وستائر عليها رسومات لشخصيات رمضانية زى عمو فؤاد وبكار وبوجي وطمطم أو نقوشات الخيامية الجميلة والمبهجة.
تعالوا نتعرف على 5 أماكن في القاهرة تشتروا منهم أحلي وأجمل الديكورات الرمضانية.
السيدة زينب
من الأماكن الجميلة اللي لها بهجة في شهر رمضان، متوفر فيها فوانيس وديكورات أكتر زي الخداديات الرمضانية والطبلة الصغيرة ومدفع رمضان والأنوار اللي بتتعلق في البلكونات والبيوت وأطباق الأكل. كل ده بأسعار معقولة بتبدأ من 10 جنيه.
أقرب محطة مترو هي محطة السيدة زينب في خط حلوان.
الخيامية
الشارع ده بقي علامة مسجلة في عالم الديكورات الرمضانية، من حيث الجودة والأسعار الحلوة، والتنوع في المنتجات. الشارع قدر ينافس أماكن كتير لها وزنها، شارع الخيامية فيه كل حاجة تقريبًا من فوانيس لصواني لأطباق وديكورات أكتر.
أقرب محطة مترو هي العتبة، ومنها هناخد مواصلة للخيامية.
الحسين
من الأماكن اللي لها وزنها في عالم الديكورات الرمضانية، هتلاقي هناك ديكورات أسعارها مميزة وحلوة، وأكتر حاجة مميزة هي التماثيل الجميلة اللي تقدر تستخدمها كديكورات رمضانية، وأهمها تمثال سيد مكاوي وهو ماسك طبلة المسحراتي.
أقرب محطة مترو هي العتبة، ومنها هناخد مواصلة لحد الحسين.
جوميا وأمازون ونون
مواقع التسوق المهمة زى جوميا وأمازون ونون هتلاقوا عليهم كل ما تتخيلوه من ديكورات رمضانية، والأسعار متباينة، والمنتجات هتوصلك لحد باب البيت.
العتبة
العتبة فيها كل حاجة من الأبرة للصاروخ، وده بجد مش مجرد كلام، والأسعار هناك رخيصة وعلي قد الأيد.
أقرب محطة مترو هي العتبة.
