The Definitive Guide to Living in the Capital , Cairo , Egypt

دلوقتي بحيرة عين الصيرة تطورت وبقت قطعة من الجمال في قلب القاهرة، وكمان اسمها اتغير وبقى اسمها “بحيرة القاهرة”، ولو اتكلمنا عن البحيرة فهي عين جوفية طبيعية موجودة في منطقة الفسطاط، واتكونت من قديم الأزل، ولكن كانت مهمشة لفترة كبيرة لحد ما قررت الحكومة المصرية تطورها. وحاليًا بقت من أفضل الأماكن اللي بنرشحها في كايرو 360 للزيارة والاستمتاع بالأنشطة المختلفة فيها.

وخلال السطور الجاية، هنقول لكم على 5 أنشطة تقدروا تجربوها في بحيرة القاهرة علشان تنبسطوا، بس لازم تعرفوا أن الأنشطة دي تابعة لشركة خاصة ومنطقة الأنشطة اسمها “Dragon Island Park”، وكمان عاملين خصم على 5 مرات لعب لـ3 ألعاب معينة، وسعرهم هيكون 400 جنيه بدل 600 جنيه، ولازم تعرفوا أن أقل سن للألعاب 10 سنوات، وأقصى وزن 120 كيلو، وماتنسوش تحجزوا علشان الدخول بالحجز.

High Ropes

هي لعبة التسلق بالحبال، وتعتبر من الألعاب اللي تخليكم تتخلصوا من الخوف، وفيها متعة كبيرة، وسعر اللعبة 200 جنيه.

Zipline

وهي لعبة مغامرة جميلة رغم انها هتكون مخيفة في الأول، وفكرتها أنكم بتتربطوا في حبل على مرتفعات وتتزحلقوا، وهي بتكسر الخوف جدًا بس أكيد بعد صراخ ورعب، وهي هتزود عندكم الأدرينالين وهتعزز ثقتكم بنفسكم، وسعر اللعبة 300 جنيه.

Climbing wall

تسلق الجدران من الألعاب اللي محتاجة عزيمة كبيرة علشان موضوع اللياقة ده صعب شوية، بس أنتم أكيد قدها وهتتسلقوا الجدران وتبقوا سوبر في نفسكم، وسعر اللعبة 100 جنيه.

Boat

أما بقى الجمال كله في رحلة المركب داخل بحيرة القاهرة، وهي مركب ملكية بتقدروا تلفوا في البحيرة لمدة  نصف ساعة بسعر 100 جنيه.

Photo session

في بحيرة القاهرة اللي حاليًا هتستمتعوا بيها بعد التطوير بشكل مختلف تقدروا تعملوا فوتوسيشن مميز وأنتوا بتلعبوا أو بتجروا وكمان داخل البحيرة لو هتستخدموا البوت، وأكيد ده مجانًا لو هتصوروا بعضكم.

ماتنسوش أن مسموح بدخول السناكس والمشروبات، ومواعيدهم من 10 صباحًا، لـ7 مساءً، ولازم تحجزوا قبلها من هنا.

العنوان: بحيرة القاهرة – بوابة ٢ بجوار متحف الحضارات الجديد – الفسطاط الجديدة.

وتقدروا تعرفوا تفاصيل أكتر عنهم من خلال صفحة الفيسبوك من هنا.