The Definitive Guide to Living in the Capital , Cairo , Egypt

الصورة الرئيسية: المطعم الدوار فندق جراند تاور.

فيه مقولة قديمة بتقول: “اللي يشوف القاهرة من فوق، غير اللي يشوفها من تحت”. القاهرة لما تشوفوها من فوق بتشوفوا جمال حقيقي، وخاصة لو الفيو مفتوح أو في منطقة لها تاريخ ومليانة حضارة، ويا سلام بقى لو الفيو على النيل هتشوفوا العجب، وعلشان كده هنقول لكم على 13 روف في القاهرة هيخليكم تشوفوها بشكل مختلف.

1- مولانا
روف مولانا من أجمل الأماكن اللي ممكن تشوف منها القاهرة بشكل مختلف، وهتشوفوا منه “ميدان التحرير – والمجمع – المتحف المصري – فندق ريتز كارلتون”، وكمان المباني التاريخية الجميلة، والأسعار عندهم تبدأ من 24 جنيه لمشروب الشاي.
العنوان: ناصية شارع الأمير كاديدار بالتقاطع مع شارع باب اللوق – ميدان التحرير.

2- توب روف
أما الزمالك فهتلاقوا فيها رووف توب، اللي بيتميز أنه بيقدم أكل مميز وكمان الفيو بتاعه هيخليكم تشوفوا النيل ومباني الزمالك التاريخية بشكل تاني، حتى السما هيكون شكلها مختلف ومميز وقت الغروب، فماتفوتوش فرصة أنكم تشوفوا القاهرة من روف توب الزمالك.
العنوان: 21 المهدي السويسري بجوار ميدان صدقي داخل فندق النيل – الزمالك.

3- ذا رووف لاونج
ولو أنتم من عشاق مصر الجديدة فأكيد روف لاونج هيكون اختيار موفق لكم، وخاصة أنهم في مكان مميز، وبيقدم أكلات مميزة، ولكن المكان غير مناسب للأطفال لأنهم بيقدموا مشروبات كحولية بالليل، فماتنسوش تستمتعوا بالغروب وكمان لو الجو حلو المكان مناسب أنكم تزوروه وتستمتعوا بفن وجمال عمارات مصر الجديدة.
العنوان: 11 شارع محمد عبيد – ألماظة – هليوبليس.

4- N روف
ومين فينا مش بيحب العجوزة، ورغم أننا دايمًا بنشوفها منطقة عادية ولكن الأكيد أنكم لما تشوفوها من فوق هتكون غير، وكمان تقدروا تشوفوا فيو مختلف الصبح ووقت الغروب في N روف العجوزة واللي الأسعار عندهم تبدأ من 25 جنيه لمشروب الشاي.
العنوان: 8 شارع محمود خليل الحصري – داخل فندق جويل العجوزة.

5- روف كافيه
أما المعادي ونيلها وغناويها وحكايتها فتقدروا تشوفوهم من خلال روف كافيه، اللي بيقدم مستوى خدمة هيعجبكم وكمان بيقدم أكل وشرب يناسب الجميع، ده غير الفيو الل هتشوفوا منه نيل القاهرة وتغنوا له كمان.
العنوان: كورنيش المعادي – فندق اللؤلؤة – أمام مرسى النهر الخالد.

6- ذا روف توب
شفتوا الأهرامات؟! طيب تعرفوا أن الأهرامات لما تشوفوها من فوق هتكون أحلى بكتير من أنكم تشوفوها من تحت، لأن الرؤية من فوق لأي حاجة بتبقى أحلى، وعلشان كده بنرشحلكم ذا روف توب علشان تقدروا تشوفوا الأهرامات بشكل مختلف وتتصوروا صور عظيمة وسط الحضارة المصرية، والأسعار عندهم تبدأ من 25 جنيه لمشروب الشاي.
العنوان: 6 شارع جرير – داخل فندق مارفيل ستون.

7- ع الجنينة
هو اسم على مسمى، علشان هتشوفوا من المكان ده أجمل وأندر وأحلى الأشجار من فوق واللي موجودة في حديقة الحيوان، والمكان مميز في الفيو بتاعه الأخضر، ولكن بننصحكم دايمًا تخلوا الزيارة قبل الغروب بوقت كافي علشان تستمتعوا بالطبيعة الخلابة في المكان، وماتنسوش المكان فيه مشروبات كحولية فغير مناسب للأطفال.
العنوان: 7 شارع رضوان بن الطبيب – بجوار حديقة الحيوان – الجيزة.

8- رووف وسط البلد
هتشوفوا من رووف وسط البلد ميدان التحرير بشكل مختلف، وكمان هتقدروا تتصوروا وخلفية الصورة المتحف المصري وفندق ستيجنبرجر النيل، وده لو تعلمون شيء عظيم هيبسطكم، وماتنسوش تستمتعوا بالغروب عندهم.
العنوان: 8 شارع شامبليون – فندق تاون فيو – ميدان التحرير.

9- صاحب السعادة
أما القاهرة الإسلامية وشارع المعز والحضارة المميزة والمباني العظيمة في تفاصيلها تقدروا تشوفوها من فوق من خلال روف صاحب السعادة اللي عندهم يوميًا حفلات ومشروباتهم مميزة جدًا وكمان أكلهم حلو، وماتنسوش أن الفيو بتاعهم تاريخي جدًا والأسعار تبدأ من 27 جنيه، ولو رحتوا بالليل فيه تكت للحفلة.
العنوان: 121 شارع المعز من شارع الأزهر – الجمالية.

10- سكاي روف
المكان ده هيوريكم “القطامية” بشكل تاني، وهتشوفوا منه المعادي والمقطم ورغم أنكم تحسوا المكان عادي في الفيو إلا أنكم هتنبسطوا علشان أنتوا مكنتوش واخدين بالكم من تفاصيل كتير وانتوا تحت.
العنوان: نادي القطامية جاردنز – طريق الهضبة الوسطى – المقطم.

11- المطعم الدوار
رغم أنه يبان غالي إلا أن اللي ماشفش القاهرة من المطعم الدوار في جاردن سيتي يبقى لسه ناقصه كتير، لأن الفيو بتاع المطعم هتشوفوا منه أماكن كتير جدًا، ومناسب جدًا للعائلات والخروجات الرومانسية والاحتفالات، وأسعارهم مش غالية قوي.

العنوان: فندق جراند تاور – جاردن ستي.

12- إيفرست كافيه
شفتوا ميدان رمسيس بزحمته ودوشته؟!، طيب ايه رأيكم تشوفوا رمسيس بشكل مختلف عن الليي بتشوفوه في الشارع، تقدروا تزوروا كافيتريا إيفرست اللي موجودة في ميدان رمسيس وهتشوفوا منها قلب القاهرة النابض بشكل مختلف.
العنوان: 44 شارع رمسيس – ميدن الأزبكية.

13- كيميت
موجود في أهم شوارع وسط البلد وكمان الروف ده بيتميز انه ملتقى ثقافي وفني مش مجرد روف وبس، وتقدروا تذاكروا فيه وتاكلوا وتشربوا، وأسعارهم في متناول الجميع وشعارهم “أرض خصبة للفنون والثقافة”.
العنوان: 30 شارع شريف – بجوار ماكدونالدز – وسط البلد.