“ليلة في حب نبيل فاروق”.. وسط البلد على موعد مع رجل المستحيل
رجل المستحيل روايات مصرية للجيب صالون عن نبيل فاروق فعالية في حب نبيل فاروق مؤلفات نبيل فاروق
Cairo 360
سعيد محمود
مصدر الصورة هنا
“الروايات الجديدة نزلت ولا لسه؟”.. ده كان سؤال الغالبية العظمى من الأطفال والمراهقين والشباب، اللي كان بيسمعه كل صاحب مكتبة أو كشك جرايد في القاهرة وباقي المحافظات في الثمانينيات والتسعينيات، عشان يقرأوا آخر مغامرات بطلهم الأسطوري “أدهم صبري” الشهير برجل المستحيل، ويسافروا عبر الزمن مع المقدم “نور الدين محمود” وفريق المخابرات العلمية في سلسلة ملف المستقبل، أول إبداعات أسطورة أدب الشباب الدكتور نبيل فاروق، الكاتب اللي أثر في جيل كامل وساب فراغ كبير في حياتهم بعد وفاته، وحنين ما بينتهيش لنزول الروايات الجديدة ليه كل سنة في معرض الكتاب.
نبيل فاروق.. الأسطورة
بدأت أسطورة دكتور نبيل فاروق مع محبيه بسلسلة ملف المستقبل، اللي خاضوا فيها مغامرات مثيرة جدًا مع فريق المخابرات العلمية بقيادة المقدم “نور الدين محمود”، وبسرعة شديدة أصبحوا من مجاذيب “ن 1″، أشهر اسم عند الشباب في ثمانينيات القرن العشرين، “أدهم صبري” الملقب بالرجل.. “رجل المستحيل”، بطل المخابرات المصري اللي سحب البساط من تحت رجل العميل “جيمس بوند”، وكانت الروايات دي وباقي كتاباته المليانة حب للوطن، السبب في اختيار المئات من الشباب الانضمام لكلية الشرطة أو الجيش عشان يكونوا ضباط أوفياء في خدمة وطنهم، وليه لأ؟ هو مين ينسى الجمل الخالدة اللي اتربينا عليها في رواياته زي “كل شيء يهون من أجل مصر”، و”ما دام الموت آت لا ريب فلأمت في سبيل من أحب”.
هدية الشركة العربية لدكتور نبيل فاروق
السنة دي هي الذكرى الثانية لوفاة دكتور نبيل فاروق، وعشان كده قررت الشركة العربية الحديثة تنظيم صالونها الأدبي الثاني بالتعاون مع منصة اقرأ لي، اللي هيكون عبارة عن ليلة بتهديها الشركة للمبدع الراحل للحديث عن كتاباته وشخصياته اللي سكنت في قلوب القراء قبل عقولهم، وهتحضره الدكتورة ميرفت راغب زوجة دكتور نبيل، والسيناريست محمد هشام عبية، والكاتب والإعلامي الدكتور محمد فتحي، والكاتب محمد عصمت، في ضيافة مصطفى حمدي رئيس مجلس إدارة الشركة العربية الحديثة، وأحمد المقدم المدير العام للشركة، والكاتبة الصحفية والأديبة نوال مصطفى.
الصالون الأدبي هيكون النهارده الاثنين 26 ديسمبر، وهيستضيفه مبنى قنصلية في 5 شارع الفضل خلف حلواني العبد اللي في شارع طلعت حرب وعشان تقدر تحضر اليوم ده لازم تسجل الأول من هنا وهم هيبعتوا لك دعوة الحضور على واتس اب.
مقترح
الحياة في كايرو
استخراج جواز سفر مستعجل في نفس اليوم.. اعرف الأوراق المطلوبة والرسوم
إجراءات استخراج جواز السفر لأول مرة استخراج جواز السفر المستعجل 2024 +10
الحياة في كايرو
