The Definitive Guide to Living in the Capital , Cairo , Egypt

فيه أماكن ليها معزة خاصة عند المصريين وكمان العرب، وفيه مطاعم ماينفعش ماتروحش تاكل عندهم، لأنهم بيقدموا جودة وخدمة وفيو وهتحسوا أنكم في بيتكم. وفي سيخ مشوي، أشهر مطعم مشويات في القاهرة، لقينا هناك بهجة حقيقية، رغم بعض الملاحظات.

اسمحوا لنا نعرفكم على تفاصيل تجربتنا في مطعم سيخ مشوي فرع التجمع، اللي أكلهم بجد.. دخل قلبنا.

أولًا، المطعم بيقدم أكل مصري ولبناني، والمكان فيه آوت دور وإن دور، والآوت كان مليان ودوشة وزحمة فقررنا نقعد في الإن دور إيريا علشان احنا بنحب الجو الهادي. عجبنا إن فريق العمل كان محترف، ودايمًا موجودين حوالينا، والديكورات بتاعتهم رغم إنكم هتحسوا أنها كلاسيكية قوي إلا أنها فخمة وتراثية، بتعبر عن عظمة المكان.

قررنا نبدأ بشوربة كريمة فراخ وكان سعرها 47 جنيه، وكانت جودتها كويسة، الكريمة مظبوطة لا خفيفة ولا تقيلة، عاملينها زي ما قال الكتاب بس كمية الفراخ كانت قليلة ومحتاجة تزيد، وكمان جربنا شوربة لسان عصفور اللي كتير مننا بيحبوها وسعرها 31 جنيه، وللأسف ماعجبتناش وماكنش فيها طعم للتوابل بتاعتنا اللي متعودين عليها في الشوربة المصري، وكمان حسينا أنهم مش مستخدمين مرقة لأن الطعم كان عادي جدًا مجرد مياه منقوعة في اللسان، وسلة العيش عندهم مخبوزة طازة وسعرها 8 جنيه، وفي الحقيقة أن العيش يبقى بفلوس ده شيء مش لطيف، بس مش مشكلة الفلوس قصاد الجودة.

ودخلنا بعدها على تجربة السلاطة، وطلبنا سلطة طحينة بـ26 جنيه، وكانت لاذعة أكتر من اللازم وفيها زيت زيتون كتير، تقريبًا هي مش بالطريقة المصرية وطبعًا ماكنش ينفع مع الطبق الرئيسي غير الطحينة المصري، وكمان جربنا البطاطا الحارة وسعرها 30 جنيه، ودي كانت عبارة عن سلاطة شامي حبيناها، وكانت مكعبات بطاطس محمرة في تتبيلة حلوة مدياها طعم حامض شوية وده اللي كان مخلي الطعم لذيذ، ولكن ماكنتش سبايسي، فمش عارفين ليه اسمها حارة.

ولأن أي مطعم مصري بيكون أساس التجربة فيه الحاجات المصرية الأصيلة اللي عاوزة فنانين يعملوها، قررنا نجرب المحشي من عندهم، وسعر طبق المشكل كان 49 جنيه، وكان طعمه مبهر وحكاية، والتتبيلة بتاعته والحشو كانوا معمولين بحب، ولكن يعيبه أنه كان بارد مش أكتر، وكمان طلبنا رقاق مصري أصيل سعره 68 جنيه، وطبقات الرقاق فيه كانت قليلة والحشو كان مغط عليها فمحسيناش بطعم الرقاق، ولكن اللحمة كانت حلوة كجودة وكطعم.

أما الطبق الرئيسي فلا صوت يعلو فوق صوت الملوخية اللي كان سعرها 49 جنيه، وهي بتنزل بشو كده زي عادة المطاعم حاليًا وحد ييجي يقلب ويعدل فيها، مايعرفش اننا جعانين ومش فاضيين لكده، بس ماشي، المهم ناكل بقى وطلع طعمها لطيف ومظبوط، وكميتها كبيرة لدرجة أننا قسمناها في طبقين.

ولأنه سيخ مشوي كان لازم نجرب المشويات ودي حاجة بديهية فأختصرنا وطلبنا ميكس جريل سعره 187 جنيه، وخلينا نقول إن كان مفاجأة لينا لما لقينا واحدة سمان جوا المكس جريل، أولًا هو مش مكتوب في المنيو، ثانيًا هو لطيف لمحبين السمان.

كمان الميكس جريل كان فيه قطعتين كباب وقطعتين شيش وكانوا لطاف جدًا وتتبيلتهم حلوة ومابيشدوش، أما قطعتين الكفتة فمكنتش أفضل حاجة، وكانت محتاجة ظبطة شوية، ولكن في المجمل التجربة لطيفة.

كنا عاوزين نطلب حلو ولكن المنيو ماكنش فيه حلو وده شيء مش لطيف بصراحة، لأن إحنا بنحب الحلو والمكان الحلو بيخلينا نحلي بعد الأكل، فقررنا نطلب شاي زردة بـ34 جنيه، وكان شاي عادي جدًا، وكمان طلبنا ليمون نعناع سعره 52 جنيه، وده ماكنش لطيف، وخفيف جدًا ومايستاهلش بصراحة، وكمان سعر المياه المعدنية الكبيرة كان 28 جنيه، ولكن بشكل عام إحنا لو حبينا نعزم حد على أكلة حلوة، خاصة لو مش مصري هنروح سيخ مشوي.

تقدروا تعرفوا أكتر عن سيخ مشوي من خلال صفحة الفيسبوك من هنا.