The Definitive Guide to Living in the Capital , Cairo , Egypt

متعة الآيس كريم مختلفة عن أي حب لأكل أو شرب تاني، واللي بيحبوا الآيس كريم من قلبهم مش بيفرق معاهم إزاي وإمتى وفين يتاكل، لأنهم بيعيشوا لحظات سعيدة ومميزة مع كل لحسة من الطعم المفضل لديهم، وعندنا في مصر أماكن مشهورة الآيس كريم بتاعها حلو، لكن إحنا لقينا في Stavolta الآيس كريم رهيب ومميز، مش مجرد طعم حلو ولا خدمة ممتازة ولكن هو له هيبة كده تخليكم لما تجربوه مرة هتحبوا التجربة.

خلال السطور الجاية هنقول لكم على تجربتنا الصغيرة للتحلية بالآيس كريم.

رغم أن تجربتنا مافيهاش تفاصيل كتير إلا أنها كانت عظيمة، وزي ما شعاهم بيقول “صُنع بحب يدويًا”، وبصراحة المكان مبهج في كل تفاصيله، ديكوراته، ألوانه، وطرق العرض والعاملين فيه كمان، وده يخلينا نقول إن المكان بيرفكت قبل أي حاجة.

جربنا من عندهم كوب آيس كريم دارك شوكلت مع قهوة، وخلينا نقول إن القهوة خلت مزاجنا حلو جدًا، وبسطتنا وإحنا بناكلها، والدارك شوكلت كانت مظبوطة بحرفية جدًا، وكان سعر البولة الواحدة 40 جنيه، والحقيقة مفترض مانقولش ده ولكن هي تستاهل كل جنيه ادفع فيها، بس إحنا ضفنا على الآيس كريم فستدق بـ15 جنيه، وللأسف طلع ني فماعجبناش وكنا نتمنى لو كان محمص كان هيفرق معانا قوي.

كمان جربنا من عندهم كونو لادو آيس فيتا، وهو عبارة عن قهوة وشيكولاتة وكان سعره 40 جنيه، والقهوة والشيكولاتة عاملين مكس كده لذيذ تحس مع كل قطمة إن فيه طعم مختلف، مرة افتكرنا فيها قرفة ومرة فكرنا ممكن يكون قرنفل، والسر في أن كل معلقة بتكون مختلفة بكمية نوع عن التاني فتديك إحساس مختلف، فعلشان كده حبيناه.

للأسف فرع المعادي مافيهوش صالة للقعدة علشان تاكلوا فيها، وكنا نتمنى يكون فيه صالة لأن الجودة دي محتاجة تتاكل جوة المكان وأنتم بتسمعوا أغاني إيطالي مع شوية مكسرات وتاكلوا بألف هنا وشفا.

تقدروا تعرفوا أكتر عنهم من خلال صفحة الفيسبوك من هنا.