The Definitive Guide to Living in the Capital , Cairo , Egypt

رنا شرف

مطعم بربر معروف جدًا في لبنان، البلد الجميل اللي مشهور بالشياكة والذوق والأكل المميز اللي ماحدش يعرف يعمله بالطعامة والجودة دي غير أهل لبنان، وكلنا عارفين إن المطبخ اللبناني فيه تفاصيل وأسرار وتكات. علشان كدة لما عرفنا إن بربر فتح في مصر، قررنا نطير على التجمع الخامس علشان نجربه.

تعالوا نقول لكم تفاصيل تجربتنا في بربر القاهرة.

أول ما هتوصل المكان هتلاحظ زحمة جامدة هناك، ولو ناوي تروح مع أهلك لازم تبعد خالص عن أيام الويك إند، لأ المكان بيكون زحمة جدًا.

المكان مفتوح زي أغلب مطاعم الوجبات السريعة، ولو هتشتري تيك أواي فأنت اللي بتخدم نفسك بنفسك، يعني لو طالب أكتر من حاجة بتروح تقف في طوابير، فيه طابور للشاورمة وللسناكس وللمعجنات، وبتروح لكل حد وتطلب منه اللي أنت محتاجه. يمكن المكان محتاج يكون منظم أكتر، لكن بصفة عامة حسينا إن فريق العمل متعاون ودي حاجة تحسب للمكان.

وحقيقي حسينا برغبة الموظفين في مساعدتنا، من أول الكاشير لحد الناس اللي بتقدم لك الخدمة.

 نيجي بقي للأكل؛ طلبنا لحمة بعجين، كانت حلوة، ويمكن طعمها زي الكتاب ما بيقول ويمكن السبب إن الشيفات هناك فيهم لبنانين. اللحمة بعجين بتكون عبارة عن عجينة وبيتفرد عليها لحمة مفرومة بطريقة معينة مع تتبيلة خاصة، وبتتحط في التلاجة لمدة معينة وبعدين بتتحط علي صينية علشان تتخبز، والصنف ده سعره كان  75 جنيه.

جربنا كمان كفتة بالخلطة، والحقيقة هي مش أحلي حاجة بس معقولة، سعرها كان 160 جنيه.

كمان جربنا سندوتش كفتة بالباذنجان، وكان جميل جدًا، عبارة عن كفتة عادية ومعاها باذنجان، لو بتحب الميكس ده يبقى لازم تجرب السندوتش ده عشان عظمة بجد، وده سعره 85 جنيه.

طلبنا كمان سبانخ بالثوم والليمون وكانت وهمية، بس هي بتتقدم باردة فممكن بعض الناس ماتحبش ده، ودي سعرها 65 جنيه.

عجبتنا جدًا كمان المنقوشة باللحمة المفرومة والمايونيز، كانت حلوة وطعم المايونيز مميز وعامل شغل عالي، ودي سعرها 95 جنيه.

قولنا نطلب كمان حلو! ولقينا هناك آيس كريم  كان حلو قوي ومنعش وسعره 50 جنيه.

انتهت تجربتنا في بربر، واللي بجد عجبتنا وخلتنا نحس إننا زرنا بيروت، وأكيد هنحب نكرر التجربة تاني.. بس أكيد مش في الويك إند!