The Definitive Guide to Living in the Capital , Cairo , Egypt

رنا شرف

الجو جميل الفترة دي، وطلبت معانا آيس كريم. كنا في مصر الجديدة، نختار إيه؟ نختار إيه؟ قولنا نجرب “سلطانة” بنكهاته الحلوة ومنتجاته المبهجة.

تعالوا نشوف إيه انطباعنا عن “سلطانة” فرع مصر الجديدة بعد ما جربناه.

بدايه كده مهم نقول إن المحل شيك جدًا، تحس إنه محل عريق كدة بديكوراته اللي ليها شخصية مميزة ومختلفة، بس للأسف الحلو مايكملش؛ مافيش مكان داخلي تاكل فيه وتستمتع بقعدة مريحة، ببساطة لإن المكان مافيهوش صالة وبيقدم خدمة تيك أواي بس.

نيجي بقي للآيس كريم. المكان بيقدم منتجات بنكهات كتير، وكان نفسنا نجربهم كلهم، لكن جربنا اللي قدرنا عليه، والبداية كانت مع نكهة القهوة، والحقيقة هي حلوة، بس طعم القهوة مر فيها ومش هيخلي كل الناس تستطعمها، وشايفين إن النكهة دي لازم تتكسر بطعم تاني معاها، زي الفانيليا مثلًا.

جربنا كمان آيس كريم لوتس، وكان خيالي. مش بس حلو، ده فوق الحلو بشوية!

جربنا ميكس اختراع بيقدمه “سلطانة”، وهو عبارة عن نكهة غزل بنات مع لبان أو علكة، الحقيقة المزج بين الطعمين مدهش، رغم إننا كنا نتمنى طعم العلكة يكون أقوى من كدة.

جربنا كمان نكهة الليمون، وكانت جامدة وسكرها خفيف، وحسينا إنها مناسبة أكتر للناس اللي بتحب الأكل الصحي، أو اللي ماشيين على دايت معين.

الأسعار في سلطانة عالية شوية، وممكن ماتناسبش كل الناس، لكن إحنا في النهاية بنتكلم على جودة عالية.

سعر الـ6 بولات 163 جنيه، وده رقم مش مناسب لكل الناس علشان نكون واقعيين.

سلطانة بيقدم كمان مؤخرًا شوكولاتة خاصة بالمحل، وممكن تشتري من هناك طبق شوكولاتة، وده ينفع هدية لأي حد بتحبه. وأكيد هنجرب شوكولاتة سلطانة في مرة تانية.

سلطانة له فروع كتير في القاهرة، زي المعادي ومدينتي والمنيل وطبعًا المهندسين. بس إحنا جربنا فرع مصر الجديدة، وده موجود في 13 شارع بغداد، الكوربة.