The Definitive Guide to Living in the Capital , Cairo , Egypt

رنا شرف

لما بنكون جعانين بندور على أقرب مطعم، لكن الموضوع بيبقى مشكلة للناس اللي مابتفضلش أكل المطاعم وبتحب أكتر أكل البيت. في الموضوع ده هنعرفكم على أأكتر من سوبر ماركت ومرز تسوق، بيوفروا أكل أشبه بالأكل البيتي. يعني هتقدر وأنت بتشتري مستلزمات البيت تعمل ساندوتش على مزاجك.

سعودي ماركت

سعودي واحد من أهم السوبر ماركتس في القاهرة، وله فروع كتير، أشهرهم فرع سيتي ستارز وفرع دريم لاند في أكتوبر. لكن مش كتير يعرفوا إن سعودي بيقدم وجبات جاهزة، زي مكرونة بالصوص الأبيض وبيتزا وسلاطات صحية زي سلاطة الجبنة وسلاطة التونة. وممكن تختار بنفسك من قسم المخبوزات العيش المفضل ليك وتروح بيه على قسم الأكلات وتختار مثلًا أنواع جبن معينة أو لحوم، وتطلب من الموظف يعملك ساندوتش.

الأسعار ممكن تكون عالية شوية بس الجودة ممتازة، والأكل لذيذ بشكل كبير.

كارفور

كتير مننا بيروح مولات، وفي منطقة المطاعم بيبقي ناس كتير جايبة وجبات كارفور ومنها مثلًا المكرونة بالبشميل، الممبار، والفراخ البانيه. والأسعار معقولة وفي متناول أكبر عدد.

يعني نقدر نعتبر وجبات كارفور بديل حقيقي للمطاعم لو كنت في المول وعاوز أكل حلو وفريش وبسعر معقول.

هايبر وان

كمان لسه مكملين معكم أكل السوبر ماركت البيتي، لو أنت معدي ووقت الغداء جه عليك وكان قريب منك هايبر وان، يبقي لازم تروح وتجرب هناك الأكلال بيتي المميز اللي بيقدموه. هتلاقي عندهم مسقعة بالحمص جميلة جدًا، ومكرونة باشميل وفطير مشلتت، والأسعار في المعقول.

آيكيا

آيكيا مش بس مركز لبيع الأثاث العملي، ده كمان بيقدم وجبات، يعني تروح تقضي اليوم في التسوق ولو طولت في المكان ونفسك تتغدا هتلاقي عندهم أكل فريش ومميز.

الجميل إن فيه ناس كتير عاجبها أكل آيكيا لدرجة إنها ممكن تروح مخصوص علشان تاكل هناك.

الأسعار عالية شوية، لكن جودة الأكل مميزة فعلًا، وهتحسوا إنها أشبه بالأكل البيتي.