The Definitive Guide to Living in the Capital , Cairo , Egypt

فكرة أنك تتنقل في منطقة ما داخل القاهرة بعربية بتكون صعبة في أوقات كتير بسبب الزحمة، ولو هتتمشوا على رجليكم ممكن تتعبوا، وفي الحالة دي مش هيبقى قدامكم غير أنكم تجربوا Rabbit App اللي بيوفر لكم سكوتر كهرباء في بعض مناطق القاهرة.

خلال السطور الجاية هنقول لكم على تجربتنا مع استخدام سكوتر Rabbit واللي جربناه في الدقي والمعادي.

في البداية التطبيق ده شغال في مناطق “الزمالك – المعادي – الدقي – مصر الجديدة – الشيخ زايد – القاهرة الجديدة -المهندسين”، ومتوفر عندهم سكوتر للإيجار بالمشوار وده بيتحسب بالدقائق، أو الايجار اليومي في كل المناطق، وكمان عجل بس حاليًا متوفر في مناطق ومنطاق لأ، وده هتشوفوه على الأبليكيشن وتحدد أقرب حاجة لك.

تطبيق Rabbit بيستلزم أنك تسجل عليه، وكمان تضيف بطاقة بنكية سارية علشان تقدر تستخدم الخدمة، وده علشان هما بيخصموا الفلوس مباشرة بعد انتهاء الرحلة، وبيتم المحاسبة على السكوتر بطالطريقة التالية: فتح اللوك 3 جنيه وكل دقيقة بجنيه.

لكن لو عاوز تاخد السكوتر يوم كامل فمتوفر الإيجار ليومين على الأقل، وسعرهم 280 جنيه، و3 أيام 340 جنيه، و5 أيام بسعر 490 جنيه، و7 أيام بسعر 630 جنيه، و15 يوم بسعر 1100 جنيه وبتوصل في الشهر لـ 1650 جنيه.

التطبيق بيقدم كمان خدمة إيجار دراجة (عجلة)، لكن دي بتكون متوفرة في بعض الأماكن مش كلها، وسعر فتح اللوك 4 جنيه، وكل دقيقة بتتحسب بـ1.25 جنيه، والإيجار اليومي بيكون أقل مدة 5 أيام بسعر 550 جنيه، و7 أيام بـ700 جنيه، و15 يوم بـ1200 جنيه، والشهر بـ1850 جنيه.

تجربة فريق كايرو 360

جربنا الإسكوتر في منطقة الدقي، وكانت تجربتنا هايلة، خاصة إنها كانت بعد الساعة 12 بالليل والشوارع فاضية وهادية، في الأول نزلنا التطبيق، وبعدين سجلنا بياناتنا والبطاقة البنكية، وشفنا أقرب مكان لينا وكان على بعد 9 دقائق، على الرغم من أنه كان فيه مكان قريب مننا لسه جديد ومش موجود على الأبليكيشن وبالتالي عملنا سكان للكود مانيوال وأخدنا السكوتر، وكان فيه شرطتين شحن في الإسكوتر (هو بيتحشن بالكهرباء)، ودي غلطة مننا بلاش تعملوها، لازم تعرفوا المسافة اللي يقدر السكوتر يقطعها بالشحن واللي بتظهر في الأبليكيشن علشان تعرفوا ترجعوا بيه، بدل ما ترجعوا بيه جر زينا، أو السرعة تنزل من 25 كيلو في الساعة لـ6 كيلو في الساعة.

قبل ما تبدأ تجرب الإسكوتر لازم يكون عندك معرفة بيه، أو على الأقل تبقى متفهم إنك هتحتاج شوية وقت علشان تفهمه، هو بصفة عامة محتاج حد يقدر يعمل توازن، خاصة في الطرق غير الممهدة، علشان ممكن تقعوا، ويفضل تستخدموا خوذة للتحرك بيها (والخدمة مابتوفرش خوذة)، لاحظنا كمان إن الأبليكيشن مش متوفر غير باللغة الإنجليزية، وده هيقلل فئة المستخدمين وعددهم.

نقدر نقول إن سعر الخدمة مبالغ فيه شوية، لأن الدقيقة بجنيه، يعني الساعة بـ63 جنيه بعد فتح العداد، وده غالي جدًا على السكوتر، وياريت الشركة المالكة تعيد نظر في التسعيرة دي علشان تستقبل مستخدمين أكتر من كل الفئات، خاصة أن الشركة حاصلة على تمويل استثماري كبير يساعدها تعمل ده.

وللأسف العجل ماكنش موجود في المنطقة اللي إحنا فيها ومجربناهوش، ولكن بالنسبة للسكوتر فهو كان عليه إقبال عظيم من الشباب، سواء بدافع الفضول أو حبًا فيه كوسيلة ترفيهية، وهو الحقيقة ترفيهي رغم أنه عملي في أنكم تقضوا مشاويركم بيه.

تقدروا تحملوا التطبيق لو كنتم بتستخدموا نظام iOS من هنا.

ولو أنتم من مستخدمي الأندرويد تقدروا تحملوا التطبيق من هنا.

ولو عاوزين تعرفوا أكتر عنهم زوروا صفحتهم على فيسبوك من هنا.