The Definitive Guide to Living in the Capital , Cairo , Egypt

رنا شرف

الكنافة من الأصناف اللي مافيش حد تقريبًا ممكن يقاوم حلاوتها، خصوصًا في رمضان، يمكن لإنها أصبحت علامة من علاماته، وبيبقي ليها طعم مختلف في الشهر الكريم عن أي وقت تاني.

وزي ما كلنا عارفين، القاهرة فيها أماكن حلويات كتير بتقدم كنافة، لكن لما سمعنا مؤخرًا عن حبيبة الكويت، قولنا لازم نجرب الكنافة هناك، وفي السطور الجاية هننقل لكم تفاصيل تجربتنا.

حبيبة الكويت له فروع كتير في القاهرة، إحنا اخترنا فرع المعادي، اللي موجود في شارع الخمسين بجانب زهراء المعادي، ولما وصلنا المكان لقيناه بالفعل بيعمل كنافة مختلفة وغير تقليدية.

أول حاجة جربناها في المكان هي الكنافة باللوتس، واللي كانت جميلة، والحلو أنها كانت خفيفة على عكس ما توقعناها، وطعم اللوتس فيها كان قليل شوية ومش طاغي، ويمكن ده إللي مخليها جميلة، إحنا جربناها كب كنافة، ودي سعرها 40 جنيه.

جربنا كمان كب كنافة الفراولة، ودي سعرها 30 جنيه، وفعلًا كانت جميلة، وأحلي حاجة فيها هي قطع الفراولة الواضحة.

أكيد ماكنش ينفع مانجربش الكنافة بالمانجا، لكن حسينا إنها كانت ممكن تكون أحلى من كده، يعني ماحسيناش إنها مختلفة عن الأماكن التانية، وكان سعرها 30 جنيه.

قبل ما نمشي قررنا نجرب برضه كنافة بالنوتيلا، وكانت جميلة وخفيفة والميكس اللي مع النوتيلا والكريمة كان رائع.

تجربتنا في المكان كانت إيجابية جدًا، وأكيد هنزور المكان تاني وتالت!