The Definitive Guide to Living in the Capital , Cairo , Egypt

الأسماك من الأكلات اللي بنغشقها بدرجة كبيرة، وبنفرح لما بنروح مكان مميز فاهم إزاي يقدم أطباق الأسماك بشكل محترف، لإنه بيفرق معانا جدًا الطعم والتتبيلة والرائحة كمان، علشان السمك من الأكلات اللي بنحتاج نتمزج بيها مش مجرد ناكلها وخلاص.

ومؤخرًا، قررنا نروح نجرب مطعم الشيف صابر، اللي قرر يقتح مجال الأسماك بعد ما كانت شهرته أكتر في مجال المشويات، وخلال السطور الجاية هنعرفكم على تفاصيل تجربتنا في المكان.

لما وصلنا المكان عجبنا إنه مكان واسع وكبير، وعجبنا كمان منظر الأسماك اللي هتشوفها بنفسك وأنت طالع المطعم، والفيو على كوبري الدقي، والقعدة عندهم في الدور العلوي، والترابيزات والكراسي من النوع الخشب اللي يحسسكم بالعظمة.

لكن للأسف فريق العمل في المطعم ماكنش أقوى حاجة، سواء في طريقة الخدمة أو حتى ترحيبهم بالكلام مع العملاء.

جربنا من عندهم شوربة جمبري أحمر، ودي كان سعرها 65 جنيه، وللأسف الخامات بتاعتها كانت مش لطيفة، والكريمة مش متخدمة، وكمان جربنا طاجن الشيف صوص أحمر بـ50 جنيه، وكان عبارة عن طاجن معمول بالجمبري وفيه “صلصة” وبصل وشوية حبشتكنات.

جربنا كمان في المكان الملوخية بالجمبري سعرها 45 جنيه، ونوعًا ما كويسة، لكن مقارنة بأماكن تانية في نفس الفئة السعرية هي مش أقوى حاجة.

وطبعًا جربنا مجموعة سلطات زي الرنجة بالطحينة 40 جنيه، سلطة خضراء وبابا غنوج والواحدة سعرها 15 جنيه، وكانوا كويسين.

طلبنا كمان شبكة جندوفلي، ودي كان سعرها 80 جنيه، ومانقدرش نقول إن الطلب كان أقوى حاجة، وحسينا إنه عادي جدًا ومافيهوش حاجة مميزة، لكن من ناحية تانية طريقة تقديمه كانت حلوة ولطيفة.

ومع الجندوفلي جربنا سمك بوري مشوي بالردة، وسعرها بالوزن كان 61 جنيه، وللأسف ماستمتعناش بيها وكانت مش أحسن حاجة.

تجربتنا في المكان ماكنتش أعظم حاجة، ورغم سمعة الشيف صابر في المشويات إلا أنه محتاج تطوير كبير في الأكلات البحرية علشان يقدر يكون منافس خاصة أن موقعه مميز واسمه سابق له.

أكيد هنزور المكان تاني قريب، ونتمنى نشوف تطوير حقيقي!

تقدروا تعرفوا أكتر عن الشيف صابر من خلال صفحة الفيسبوك من هنا.