The Definitive Guide to Living in the Capital , Cairo , Egypt

لو كنت من عشاق القاهرة القديمة، فأكيد روحت قبل كده منطقة القلعة، وعديت من أمام مسجد الرفاعي.. المكان اللي هتحس فيه بروح القاهرة التاريخية الحقيقية.. لكن هل تعرف إن المنطقة دي فيها مركز ثقافي حديث يستحق الزيارة؟ تعالى نتعرف مع بعض على “تكية مسافر”.

من حوالي سنة، كان فيه بنت مصرية جميلة اسمها “ندى” بتتمشى في شوارع القاهرة القديمة، وتحديدًا أمام مسجد الرفاعى بمنطقة القلعة، وهناك لفت نظرها لافتة على شقة سكنية مكتوب عليها “شقة للإيجار”، البنت حست بانبهار لما عرفت إن عمر الشقة دي حوالي 175 سنة، وتواصلت مع صديقتها الجميلة “شيماء”. الاتنين حسوا إن هو ده الحلم اللي بيحلموا بيه، وقرروا يحولوه لحقيقة!

“ندى” و”شيماء” من عشاق القاهرة التاريخية، علشان كده اتفقوا مع بعض يأجروا الشقة ويحولوها لمركز ثقافي مميز جدًا باسم “تكية مسافر”.

أهلًا بيكم في تكية مسافر!

“تكية مسافر” بتقدم لجمهورها ورش وندوات ثقافية وأنشطة مختلفة.

الشقة كان فيها مشاكل كتير، لكن قدرت “ندى “وشيماء” يغيروا المكان للأجمل ويحلوا مع بعض كل مشاكل الشقة، وبعدها بدأ المكان يتغير تمامًا.

“تكية مسافر” أصبحت مركز ثقافي بيستقبل كل عشاق القاهرة التاريخية سواء من المصريين أو الأجانب، وبتقدم ورش في مجالات مختلفة زي الرسم والصناعات اليدوية المختلفة.

وبتضم “تكية مسافر” مكتبة ثقافية فيها كتب بلغات مختلفة، منها جزء مخصص للأطفال، وبتتوسطها قاعة “عم حربي”، اللي بيعتبر واحد من أقدم بائعى الكتب فى سور الأزبكية.

التكية فيها كمان معرض ثابت لبيع المنتجات المصرية الأصيلة اللي جاية من أماكن مصرية مختلفة زي سيوة وسانت كاترين وغيرها من مناطق مصر.

التكية فيها كمان مساحة عمل مشتركة تقدروا تشتغلوا فيها أو تذاكروا.

اعرفوا أكتر عن تكية مسافر من صفحتهم على فيسبوك.