The Definitive Guide to Living in the Capital , Cairo , Egypt

كتابة وتصوير: رنا شرف

النهارده عشاق الأكل اللبناني الجميل، زي التبولة والفتوش واللحم بالعجين، وكل الأكلات اللبنانية المميزة اللي بتفكرنا ببلد بنحبه جدًا، هيكونوا على موعد مع تجربة جديدة لفريق كايرو 360، استمتعنا فيها بالأكل في مطعم عنب بيروت رغم وجود بعض الملاحظات.. التفاصيل؟ في السطور الجاية!

أول ما هتدخلوا “عنب بيروت” فرع كايرو فيستفال سيتي، هتحسوا إن ديكور المكان بيخطفكم لجو سبعيتاني بامتياز، من أول الألوان، لحد الديكور. هتشوفوا كمان على الحيطان لوحات فنية وعلم لبنان، وأكيد هتحسوا إن المكان فيه طاقة إيجابية وقدرة على نقلكم لرحلة مبهجة للبنان بجد.

نيجي بقى للأكل، أول طبق جربناه كان كوسة باللبن، (سعره 100 جنيه)، ودي بتتقدم مع أرز أبيض، وهي عبارة عن كوسة باللحمة المفرومة ولبن زبادي وثوم، وحقيقي كان طعمها جميل، لكن لاحظنا إن طعم الثوم كان زيادة شوية وكان واضح فيها.

تاني طبق جربناه، كان مشاوي شيش طاووق، (سعره 140 جنيه)، وده عبارة عن شيش طاوق مشوي وبطاطس، مع تومية وعيش طعمه حلو، بس للأسف الكمية مش كبيرة، لكن بشكل عام الطبق كان طعمه معقول.

جربنا كمان من المقبلات، بطاطس مهروسة بزيت زيتون، كانت خفيفة وجميلة، جربنا كمان بابا غنوج وعجبنا (سعره 42 جنيه)، رغم إن الكمية كانت قليلة.

بمجرد ما انتهينا من الأكل، قررنا نجرب المشروبات في المكان، وطلبنا عصير ليمون فريش مع ثلج، وده مشروب سعره 48 جنيه، طعمه منعش، واتقدم لنا مع نعناع، لكن ضايقنا كمية الثلج الكتيرة فيه واللي خلتنا مااستمتعناش بطعم الليمون كويس.

تجربتنا في المكان كانت معقولة، حبينا المكان وجودة الأكل، وعجبتنا القعدة، لكن ضايقنا السعر الغالي مقارنة بالكميات.