The Definitive Guide to Living in the Capital , Cairo , Egypt

بقلم: رنا شرف

كتير مننا بيحب الفراخ، وبيعتبرها بديل صحي للحوم الحمرا. كمان بعضنا بيحب الأكل الكوري، ولو كنت من عشاق الفراخ والأكل الكوري في نفس الوقت، اسمح لنا نقول لك على مكان ظريف في المعادي هتلاقي فيه نفسك!

“كوكيو – KOKIO ” هو مطعم كوري متميز، أول ما هتدخل المكان على طول هتحس إنه مكان بسيط ومبهج، وهتلاحظ الديكور المريح للعين، واللوحات اللي مكتوب عليها بالكوري، وصور لزوار المطعم وهم بيحتفلوا في المكان بمناسبات وذكريات حلوة.

أول حاجة لفتت انتباهنا في المكان بعد الديكورات، هي نظافة المكان. حسينا بجد إننا في البيت مش في مطعم، فريق العمل ناس لطيفة وبيرحبوا بالإجابة عن أي أسئلة تخص الأكل ومكوناته بالتفصيل، خصوصًا لو أول مرة تروح وحابب تستكتشف كل حاجة تخص تجربة الأكل هناك.

أجمل حاجة عجبتنا لما عرفناها هي أن الأكل كله بيتعمل من شيفات كوريين، يعني بيتعمل على أصوله.

نيجي بقى للمهم! الأكل:

أول صنف جربناه في المكان كان فراخ بالتوم 5 قطع، والطبق ده سعره 90 جنيه، والحقيقة الفراخ كانت مستوية بشكل كافي وده لطيف، والتوم طعمه ماكنش مزعج لكن في نفس الوقت واضح وخفيف، تتبيلة الفراخ كانت زي ما الكتاب بيقول، جميلة ومن الأصناف اللي لازم تجربوها في المكان.

تانى صنف جربناه هو كرات السمك، ودي سعرها 50 جنيه، والطبق ده عبارة عن سمك مهروس مع خضار مقلي ومتبل وبيتقدم مع صويا صوص. الطبق ده عجبنا جدًا وكميته كانت مناسبة وطعمه يجنن.

نيجي بقى للبطاطس المحمرة، واللي كانت ظريفة قوي ومقرمشة وكان طعمها بيتي وهتحس كأنك بتاكلها في بيتك مش في مطعم. ودي سعرها 30 جنيه.

جربنا كمان الفراخ المقلية مع البصل الأخضر، وكانت جميلة وطعمها عجبنا بدرجة كبيرة، الـ 5 قطع بـ 115، وعجبنا كمان عندهم حلقات البصل المقلي.