بعد النجاح في الثانوية العامة.. 15 نصيحة للنجاح في حياتك الجامعية
الثانوية العامة الجامعة النجاح في الجامعة نصائح للنجاح في الحياة الجامعية
Mohamed Talaat
أخيرًا ظهرت نتيجة الثانوية العامة في مصر، مبروك لكل الناجحين، لكن هل الثانوية العامة هي نهاية الطريق؟ بالتأكيد لأ.. لسة عندنا الجامعة، واللي بيعتبر النجاح فيها هو الخطوة الأولى في تحقيق المستقبل اللي بيحلم بيه أي طالب.. في الموضوع ده هنعرفكم على 15 نصيحة للنجاح في الحياة الجامعية.
1- خليك دائمًا متابع آخر المستجدات في سوق العمل في مجالك، يعني لو بتدرس تجارة لازم تتعلم أثناء الدراسة أحدث برامج الكمبيوتر المتعلقة بالمجال ده.
2 – اتعرف على أساتذتك في الجامعة، وحاول تصنع معاهم علاقة مبنية على الاحترام والصداقة وتتعلم منهم بجد وتسألهم عن أي حاجة أنت محتاج تفهمها صح عن مجالك.
3 – رتب أولوياتك في الجامعة، المذاكرة مهمة لكن الأنشطة كمان مهمة خصوصًا الأعمال التطوعية، وأوعى تنسى الكورسات وحضور الورش المختلفة اللي هتنمي مهاراتك.
4 – طور نفسك بشكل مستمر، النجاح في الحياة العملية مختلف عن الجامعة، ومحتاج منك تطوير مستمر لمهاراتك.
5 – أوعى تتردد أبدًا في طلب المساعدة.
6 – اتعلم مهارة إدارة الوقت، هتلاقي المهارة دي متوفرة في الكتب وفيديوهات اليوتيوب وكمان على منصات التعلم الذاتي المجانية زي منصة إدراك على الإنترنت.
7 – حافظ على لياقتك وصحتك، اهتم بالرياضة، والأكل الصحي، وشرب المياه.
8 – تواصل مع عائلتك بشكل مستمر، وماتخليش الجامعة تشغلك عنهم.
9 – اصنع دائرة كبيرة من الصداقات، وفي نفس الوقت دور على فرص تدريب صيفي.
10 – نظم جدولك بشكل محترف، ولو مش عارف تعمل ده صح، استعين بفيديوهات يوتيوب اللي هتعلمك صناعة جدول مهام سليم ومحترف.
11 – نمي مهاراتك في الكتابة واتعلم برنامج باور بوينت، ده هيفيدك بعد التخرج في كتابة تقارير محترفة وعروض تقديمية مبهرة.
12 – اقرأ واقرأ واقرأ.
13 – اتعود تتحمل المسؤولية.
14 – اتعامل مع فترة التدريب الصيفي بجدية.
15 – حط في بالك دائمًا إن الحياة مليانة حاجات تقدر تتعلمها.
