The Definitive Guide to Living in the Capital , Cairo , Egypt

مهرجان القلعة الدولي للموسيقى والغناء أو محكى القلعة هو واحد من أهم الفعاليات الفنية الغنائية اللي بتُنظم في القاهرة، وبتضم مجموعة كبيرة من الفنانين والفرق الموسيقية، واللي بينتظرها جمهور كبير من عشاق الغناء.. وحضور كل الحفلات بيكون بسعر رمزي، وبعد إلغاء الحفلات السنة اللي فاتت بسبب جائحة كورونا، المهرجان بيرجع لنا السنة دي من تاني من خلال الدورة 29، تعالوا نتعرف أكتر على المهرجان.

أول حفلة لـ”محكى القلعة” هتكون يوم 15 أغسطس الجاري، والحفلات في المجمل هتكون الساعة 8 مساءً، وهتستمر الفعاليات لمدة 16 يوم علشان تنتهي في 30 أغسطس 2021، وهيكون الدخول من الساعة 5 مساءً وهيتم توفير 6 منافذ لبيع التذاكر.

السنة دي فيه تعديلات كبيرة حصلت في مسرح القلعة، وتم تطوير المسرح وتعديل زاوية الرؤية علشان الحضور يقدروا يشوفوا المسرح من أي حتة موجودين فيها، وكمان هيكون فيه شاشات عرض منتشرة علشان تساعد الناس على التفاعل، وهيتم تصوير الحفلات بأحدث التكنولوجيا، وهيتم توفير وسائل نقل من من بوابة الدخول لحد المسرح، ولكن خلوا بالكم ممنوع الدخول أو التواجد داخل القلعة بدون كمامة.

أما الحفلات فهيكون فيها نجوم كتير وهم: “مي فاروق – أحمد عفت – أحمد جمال – ياسين التهامي – ياسر سليمان – علي الحجار – نادية مصطفى – فؤاد ومنيب – هاني شاكر – وائل الفشني – لينا شاماميان – هلا رشدي – طارق العربي وأبناءه – حازم شاهين – كارمن سليمان – نداء شرارة – محمد الشرنوبي – نوران أبو طالب – هشام عباس – محمد محسن – جنات – سعيد الأرتيست – نسمة محجوب – دينا الوديدي – نسمة عبد العزيز – مدحت صالح”.

وكمان من ضمن المشاركين في الحفلات فرق كبيرة “وسط البلد – كايرو كافيه – فرقة أوبرا القاهرة – فرقة الباليه – سبيد أوف هارتس – بغدادي بيج باند”، ولحد دلوقتي وزارة الثفافة لسه ماأعلنتش جدول الحفلات ولكن تابعونا لأننا هنزله أول ما يكون متاح.