إضاءة ليزر وحدائق ومطاعم ومحلات حرف يدوية.. تفاصيل تطوير منطقة سور مجرى العيون
تطوير القاهرة التاريخية تطوير سور مجرى العيون تطوير منطقة سور مجررى العيون خطة تطوير مجرى العيون
Mohamed Talaat
سور مجرى العيون واحد من أعظم الأثار المصرية، مكان بيعبر عن عراقة القاهرة وأصالتها، لكن للأسف الإهمال والتلوث والعشوائية كانوا منتشرين في المنطقة دي بدرجة كبيرة، علشان كده الحكومة المصرية قررت تغير الواقع القبيح اللي استمر لسنوات من خلال خطة طموحة لتطوير السور والمناطق المحيطة بيه.. تعالوا نعرف تفاصيل أكتر عن عملية التطوير.
الهدف الأساسي من المشروعات الجارية لتطوير منطقة القاهرة التاريخية، هو استعادة الوجه الحضاري للقاهرة، علشان تكون منطقة جذب سياحي وترفيهي وثقافي.. وتطوير منطقة سور مجرى العيون من المشروعات المهمة اللي بتهدف لإحياء القاهرة التاريخية بوجهها الحضاري وإزالة أي تعديات وتلوث وعشوائيات حصلت في المنطقة طول السنين اللي فاتت.
عملية التطوير بتشمل منطقة بحيرة عين الصيرة ومحيط المتحف القومي للحضارة المصرية وحديقة الفسطاط بمصر القديمة، ده غير طبعًا عملية التطوير الجارية في منطقة المدابغ وسور مجرى العيون، وكل ده هيتم وفق أعلى المواصفات والمعايير، وهيكون فيه اهتمام بزيادة نسبة المسطحات الخضراء.
بيتميز سور مجرى العيون بمساحته الكبيرة، واللي بتوصل لـ 3500 متر وطرازه المعماري المتميز اللي بيعود لفن العمارة الإسلامية وبيبدأ من منطقة فم الخليج لمنطقة السيدة عائشة، وبدأت الدولة المصرية في تنفيذ خطة تطوير منطقة مجرى العيون في 2019 وهو مشروع طموح بتتبناه محافظ القاهرة بالتنسيق مع وزارة السياحة والآثار، وتم بالفعل إزالة تعديات كبيرة ونفايات وحظائر الحيوانات اللي كانت في محيط مجرى العيون، والعمل على ترميم الأجزاء اللي تم هدمها وإحياء السواقي من خلال الإضاءة بالليزر وإقامة الحدائق والمطاعم ومحلات للحرف اليدوية.
هيتضمن مشروع التطوير كمان إنشاء قاعات العروض الثقافية والحفلات التراثية وإعداد المنطقة علشان تكون إضافة جديدة للأماكن السياحية والثقافية في العاصمة وصيانة موقع مبنى مأخذ المياه الموجود بمنطقة فم الخليج المطلة على نهر النيل، وصيانة نماذج السواقي المقامة أعلى المبنى بمساعدة فنيين من معهد الحرف الأثرية بوزارة الآثار واللي نفذوا أعمال الصيانة مع عدد من الفنيين التابعين لمعهد الحرف الأثرية بقطاع الآثار الإسلامية والقبطية بوزارة الآثار.
هيشمل تطوير مجرى العيون كمان إقامة البازارات السياحية، وأماكن انتظار سيارات وغيرها من الخدمات.
