The Definitive Guide to Living in the Capital , Cairo , Egypt

الهاند ميد من الفنون الجميلة اللي كتير من الناس بتحبها، ونجمتنا النهارده هي إنجي أبو الورد، اللي قررت تقسم حياتها بين مهنتها كطبيبة أسنان، وبين الحاجة اللي بتحبها وهي الفن، وبالتحديد صناعة العرائس من الورق.. تعالوا نتعرف أكتر على قصة إنجي طبيبة الأسنان مع تصميم العرائس.

إنجي كان نفسها تدخل كلية فنون جميلة، ولكن أهلها اعترضوا فدخلت طب أسنان واتخرجت منه، لكن من 4 سنين بدأت ترضي شغفها القديم بالرسم والألوان وطورت من حبها للرسم بأنها تعمل عرائس لثقافات مختلفة “بدوي – هندي – مكسيسكي”، ولكنها مركزة أكتر مع العرائس الأفريقية بألوانها الجميلة.

العرائس كلها بتكون من الورق والقاعدة بتاعتها من الخشب، وكل الخامات المستخدمة بتكون إعادة تدوير، وبتحول الورق مع الغراء والعجين وبتشكلهم بنفسها وبتضيف عليهم الورد والإكسسوار المناسب وتلونهم بألوان مبهجة، وبيطلعوا في النهاية عروسة مميزة.

أول عروسة صنعتها إنجي كان اسمها حوا، ودي كانت هدية لصديقتها النيجيرية.

طبيبة الأسنان شاركت كمان في معارض كتير للهاند ميد، وحلمها أن شغلها من العرائس الأفريقية يلف العالم كله، وحاليًا هي مقسمة وقتها ما بين الصبح في مستشفى بتمارس طب الأسنان، وبالليل في ورشتها علشان تعمل العرائس، وهي علمت نفسها عن طريق فيديوهات اليوتيوب، ورغم اختلاف المجالين إلا أنها لقت تشجيع كبير من أسرتها وأصدقائها إنها تكمل وتستمر في هوايتها اللي اتحولت لاحتراف.

وعلشان تتعرفوا أكتر على إنجي وشغلها وتطلبوه تقدروا تزوروا صفحتها على الفيسبوك من هنا.