The Definitive Guide to Living in the Capital , Cairo , Egypt

الزراعة داخل المنزل والعناية بالنباتات من أجمل الهوايات اللي ممكن تكتسبوها في حياتكم، ومن أهم المميزات في رعاية النباتات والزرع في المنازل انها بتديكم طاقة ايجابية وكمان بتعلمكم الاهتمام والهدوء والصبر في التعامل مع الأمور الحياتية، وعلشان إحنا في كايرو 360 بنحب النزرع وبنحترمه، هنقولكم خلال السطور الجاية 4 نصائح مفيدة جدًا عن تربية الزرع سواء داخل المنزل أو في البلكونة.

اختاروا النبات المناسب

لازم تختاروا النبات المناسب في المكان المناسب، والفصل المناسب، هل عاوزين نباتات بورق أخضر طول السنة، ولا نبات مزهر في مواسم معينة، وهل عاوزينه بيتسقي كل يوم، ولا يوم ويوم، ولا من النوع اللي مش محتاج مياه كتير، وهل محتاجين نبات بيعيش في الشمس المباشرة، ولا الشمس غير المباشرة، ولا في الضل، ولا مناسب للشمس والضل، وهل هتخلوه داخل المنزل ولا في البلكونة ولا في الحديقة، والشخص اللي هيساعدكم في اختيار نبات مناسب هو متخصص النباتات اللي هتلاقوه في أي مشتل قريب منكم أو محل زرع، والأسئلة اللي فاتت كلها لازم تحددوا إجاباتها قبل ما تشتروا زرع جديد.. وتعرفوا المتخصص في بيع الزرع عن احتياجاتكم بشكل واضح.

احتياجات النباتات

كل نبات وله احتياجات غير التاني، سواء تربة خاصة أو سماد معين، أو حجم وعاء مختلف ما بين كبير وصغير ومتوسط، كمان لازم تعرفوا أوقات الري المناسبة لكل نبات وكمية الماء اللي بيحتاج إليها وفهم أسباب تصدع التربة أو تغير لونها للأفتح ودي بتكون اشارة لاحتياجها للماء، ومتابعة العفن على سطح التربة أو المياه أسفل الوعاء، والبقع الفاسدة. واللي هيساعدكم في ده، فيديوهات يوتيوب، وكتب الزرع المتخصصة، وموظف بيع النباتات اللي هتشتروا منه الزرع بتاعكم.

اختيار المكان

كل زرعة سواء ورق أخضر أو مزهرة ليها مكان لازم تتحط فيه، سواء في الشمس أو الضل أو بين الاثنين، وكمان لو هتحطوها في الشمس لازم تعرفوا هي محتاجة شمس مباشرة ولا غير مباشرة، ويفضل عدم تبديل مكان النباتات لأنها بتاخد وقت علشان تتعود على البيئة.

الأسمدة

النباتات اللي بتحتاج مكان مفتوح بتختلف عن النباتات المنزلية الداخلية، وكل نبات بيحتاج لأسمدة على حسب نوعه، فلو النبات مزهر هتحتاجوا بوتاسيوم عالي، ولو النبات ورق أخضر هتحتاجوا نيتروجين عالي، والنباتات الصحراوية هتحتاج سماد مختلف وهكذا، وبيتم تسميد كل النباتات مرة واحدة في الشهر ويفضل استخدام الأسمدة المصنعة للنباتات المنزلية.

وفيه قنوات على يوتيوب هتساعدكم على فهم عالم النباتات والاهتمام بيها.